MOSULOD og kasabutan ang kagamhanan sa dak­bayan sa Mandaue sa Philippine Veterans Affairs Office (PVAO) alang sa pagpatambal sa mga Mandauehanon nga beterano lakip na ilang mga benepisaryo kon pananglit kini maospital. 

Kahinumduman nga ang PVAO pinaagi sa ilang administrator nga si Lt. Gen. Ernesto G. Carolina nipadala og suwat ni Mayor Luigi Quisumbing kalabot sa rebisyon sa Veterans Hospitalization Benefit diin nakig-partner ang PVAO sa PhilHealth aron maapil ang tanang mga beterano sa World War 2. 

Ang programa naghatag sa mga beterano ug ilang mga dependente og P800 ngadto sa P1,500 nga hospitalization benefit matag adlaw sud sa 45 ka adlaw nga pagka-confine sa usa ka tuig. 

Usa ka memorandum of agreement unya ang lagdaan sa dakbayan tali sa PVAO alang sa implementasyon sa pagpa-ospital, medical care ug treatment program sa mga beterano sa gubat ug ilang mga dependente aron malugwayan ang ila unyang pagpatambal. 

Ang city assistant legal officer ni Quisumbing nga si Eliseo Ceniza Jr. nagkanayon nga ang programa sa PVAO maka-ayo ug pabor sa mga beterano aron katabangan kini sa ilang serbisyong panglawas. 

Si Bise Mayor Carlo Fortuna, presiding officer sa Konseho, nagkanayon nga iya na nga gi-refer sa komitiba sa laws and ordinances ang MOA nga sudlan sa Mandaue City Hospital nga representaan ni Quisumbing ug sa PVAO nga maoy mopaimplementar sa serbisyong panglawas sa mga beterano ug ilang mga dependente. 

Ubos sa RA 7696, ang PVAO gimandato nga maoy mopa-ospital, mopatambal sa mga Pilipino nga beterano ug ilang mga dependent pinaagi sa Veterans Memorial Medical Center ug veteran wards sa mga piniling tambalanan sa gobyerno tibuok nasud. 

Si Carolina nagkanayon nga ang pampublikong tambalanan sa Mandaue ug Pangadinan nakapasar sa standard sa PVAO sa paghatag og de-kalidad nga health services sa mga beterano ug mga dependente niini.