NASIKOP ang usa ka lalake human giingong nagpaila nga pulis ug nasakmitan og armas de fuego sa may Roro Road, Sitio Camolinas, Brgy. Poblacion, Cordova lalawigan sa Sugbo pasado alas 11 niadtong Biyernes sa gabii.
Ang nasikop giila nga si Noel Pable, 37, ulitawo, taga Sitio Katura, Brgy. Poblacion.
Sigon ni PO3 Vilma Degamo sa Cordova Police Station nga naaktohan si Pable sa baranggay tanod nga nagrobing sa nahisgutang dapit nga pinangulohan ni Reynaldo Urot.
Nagdala kini og armas nga walay lisensya uban sa lima ka mga bala ug arogante pa nga nagpaila nga police officer ug nagsul-ob pa og uniporme sa pulis.
Nakuha gikan kang Pable ang mga ebidensya sama sa itom nga jacket nga adunay CCPO nga tatak, itom nga kawo nga adunay marka nga pulis, lambat sibat volunteer ID ug armas nga kalibre .357 revolver nga way lisensya.
Nasuta nga Lubas member si Pable sa Lapu-Lapu city.
Natanggong si Pable sa Cordova Police Station ug nag-atubang sa duha kaso nga kalapasan sa Republic Act 10591 o kalapasan sa paghupot og illegal nga armas ug usurpation of authority.
Samtang sa Minglanilla, nasikop usab ang usa ka lalaki human nasakmiti og armas de fuego nga walay lisensya pasado alas 11:00 niadtong Biyernes sa buntag sa Upper Linao Lipata, Minglanilla.
Ang nasakmitan giila nga si Jerome Labajo, 28, lumolupyo sa Lawaan 3, dakbayan sa Talisay.
Gibutyag ni SPO2 Oliver Dacua sa Minglanilla Police Station nga nasikop si Labajo human nasakpan nga naghupot og armas nga way licensya sa silingan nga pulis nga si PO3 Reglyn Pepito.
Nakuha sa possession ni Labajo ang kalibre .22 nga revolver nga way serial number ug licensya uban sa upat ka mga bala.
Si Pepito na assign sa Asturias Police Station ug silingan niya si Labajo mao nga nabantayan nga adunay armas hinungdan sa pagkasikop ug pagkatanggong sa Minglanilla Police Station aron pasakaan og kaso nga kalapasan sa paghupot og illegal nga armas. Niño B. Baldevino, USJ-R B.A Communication Intern