UNOM na, lakip ang 4-anyos nga batang lalake, ang patay sa linog sa dakbayan sa Surigao, Caraga Region sa Mindanao alas 10:03 sa gabii niadtong Biyernes.
Usa ka 6.7 nga magnitude nga linog ang nitay-og sa maong dapit diin lakip ang Sugbo nga nakasinati niini.
Base sa taho gikan sa Caraga Regional Disaster Risk Reduction and Management Council alas 11:00 sa buntag kagahapon nga aduna’y taytayan nga nahugno, mga dalan nga nangliki ug dili maagian, mga estraktura nga nangaguba.
Sa pagkutlo ning balita wa pay mga kuryente sa mga lungsod sa San Francisco ug Malimono sa Surigao del Norte.
Base sa laing taho, duna nay kuryente sa Surigao City sugod kagabii.
Samtang ang Mainit, Sison ug Taganaan lakip na ang tibuok probinsiya sa Surigao del Norte nagpabilin nga wala’y kuryente.
Tungod usab kay naguba ang mga tubo sa Surigao Metropolitan Water District, wala’y tubig sa dakbayan sa Surigao.
Nideklarar ang Surigao City og state of calamity tungod sa kalamidad.
Ang tugpahanan sa Surigao gisirhan usab hangtod Marso 10 tungod sa mga liki sa runway niini kini matod sa Civil Aviation Authority of the Philippines.
Tanang mga sakayang pangdagat nga paingon unta sa Lipata Port Station gi-redirect sa Surigao City Port tungod kay dili maagian ang taytayan ug dalan paingon ug gikan sa Lipata Port.
Lakip sa nakabsan sa ilang kinabuhi sa maong linog, Roberto Eludo Jr., 39; Wilson Lito kapin sa 20; JM Ariar, 4; Lorenzo Deguino, 85; Roda Justina Taganahan, 83; Wenefreda Aragon Bernal, 66.
Trauma, heart attach ug natumbahan og bungbong ang rason sa kamatayon niini.
Niabot sa 108 usab ang natala nga angol diin 80 ang gidala sa Caraga Regional Hospital, 20 sa Surigao Medical Center ug walo sa Miranda Family Hospital sa Surigao.
Natala nga nahugno ang Anao-aon Bridge sa San Francisco, naguba usab ang Surigao City Trade School, Surigao State College of Technology ug Yuipco Building.
Matod ni Annette Villaces, tigpamaba sa Surigao City Government nga tanang klase sa tanang level ug trabaho sa buhatan sa gobyerno ug pribado ang suspendido “until further notice”.
Ang maong tectonic nga linog nitay-og alas 10:03 sa gabii Biyernes nga aduna’y epicenter 14 kilometros amihanang-kasadpan sa Surigao City ug aduna’y gilawmon nga 11 kilometros.
Wala ra hinuoy tsunami nga nahitabo.
Nasinati ang linog sa Intensity VI sa Surigao City ug Pintuyan, Southern Leyte; Intensity V sa Mandaue, San Ricardo, Limasawa ug San Francisco; Intensity IV sa Hinunangan ug Butuan City; Intensity III sa Hibok,hibok, Camiguin, Tolosa ug Tacloban, Leyte, Bislig City ug Gingoog City sa Misamis Oriental; Intensity II sa Cagayan de Oro City, Talocogon City sa Agusan del Sur, Dumaguete City sa Negros Oriental; ug Instrumental Intensity I sa Cebu City. HBL/Sunnex