ANUGON nga sa kalinghod sa iyang pangedaron, miserbisyo na siya sa katawhan, ang katawhan nga giingong tagsa lamang sa ilang kinabuhi nga makakita sila og usa ka doktor.

Ang atong bida karong adlawa mao si Dr. Myles Clement Ababon, ang nag-inusarang doktor sa Paquibato District sa dakbayan sa Davao.

Linghod man ang pangedaron, apan puno sa kadasig sa kaugalingon sa pagdalit og serbisyo ug sakto sa kahibalo sa pagpanambal isip usa ka family medicine doctor.

Garbo niya nga produkto sa scholarship sa gobyerno sa panahon ni kanhi presidente ug karon Pampanga Representative Gloria Macapagal-Arroyo.

"Produkto ko sa scholarship sa government, ug sa akong paghuman, gi-extend sab nako ang serbisyo sa katawhan," sulti ni Dr. Ababon atol sa Pulong-Pulong ni Pulong sa Sangguniang Panlungsod niadtong Pebrero 7, 2017.

Sumala ni Councilor Mary Joselle Dilig-Villafuerte, chairman sa Committee on Health sa konseho nga talagsaon lamang ang kadasig nga gipakita ni Dr. Ababon nga mopa-assign sa Paquibato.

"Dugay-dugay naman gyud nga walay doktor ang Paquibato, mao nang among nakita nga talagsaon lamang nga sama kang Dr. Ababon nga, ganahan siya sa pag-assign nato niya didto, ug kini kabahin gayud sa atong paghatag og serbisyo sa katawhan," sulti ni Villafuerte.

Giingong makakumot sa dughan ang nahimong sugilanon ni Dr. Ababon sa Paquibato, gumikan nasinati niini ang kinabuhi sa mga lumad sa dapit.

"Naay mga higayon nga diha ko makitulog sa balay sa mga pasyente, dalitan ko'g pagkaon nga sama sab sa ilang gikaon. Nakita nako sa akong kaugalingon nga lami gayud ang pagserbisyo kung kini dulot sa kasingkasing. Kinahanglan naa ang imong gugma sa imong mga pasyente, kay naguol na silang daan," pagpaambit sa batan-ong doktor.

Bisan og anaa lamang sa P7,000 ang suweldo sa mga doktor sa baryo, madasigon gihapon ang atong bida sa paghimo sa iyang mga gimbuhataon, sa pag-atubang sa iyang mga pasyente uban sa pagtuong, ang tinuod nga serbisyo wa nagkinahanglan og balor nga salapi, nagkinahanglan kini'g paghimo sa tabang ngadto sa nanginahanglan.

Si Dr. Ababon minyo kang Vernie Carla Catampo-Ababon, usa ka dentist, ug duna sila'y usa ka anak.

Dr. Myles Clement Ababon, saludo kami kanimo!