MOKABAT sa unom na ka mga tawo ang namatay ug giingong dunay gibana-banang 200 ka tawo ang naangol sa 6.7 magnitude nga linog sa Caraga Region niadtong Biyernes sa gabii.

Si Surigao del Norte Second District Representative Robert "Ace" Barbers nagbutyag sa Bombo Radyo Nationwide nga padayon ang ilang gihimong assessment sa mga apektado sa linog.

"Sa kasalukuyan, naglilibot ang ating mga kasamahan para maiabot natin ang mga paunang tulong sa ating mga kababayan," sulti ni Barbers Sabado sa udto.

Ang Regional Disaster Risk Reduction and Management Council sa Caraga padayong nag-monitor sa epekto sa linog sa Surigao City ug probinsya sa Surigao del Norte.

Base sa Earthquake Information No. 1 nga gipagula sa Philippine Institute of Volcanology and Seismology (Phivolcs), ang pagtay-og dunay gilawmon nga upat kilometros gikan sa sentro ug dunay intensity VI ang natala.

Nabati sab sa Davao City ug pipila ka dapit sa Davao Region ang Intensity II ug Intensity III sa linog.

Sa laing bahin, wa una gitugtan sa Surigao City International Airport nga mo-landing ang mga abyon gumikan nangliki ang runway sa maong tugpahanan.

"Temporaryo una natong gi-suspend ang pag-landing sa atong mga aircraft kay halos tag-upat ka dangaw ang gilapdon sa mga liki sa runway," ingon ni Julito Abrasado, manager sa Surigao Airport.

Nagpahibalo ang Caraga Regional DRRM Emergency Operations Center nga lauman ang mga aftershocks apan walay gikatahong tsunami warning. (Jeepy P. Compio)