"NAKADAGAN ko sa ubos nga walay tsinelas."
Kini ang pamahayag ni Marissa Navales, territory manager sa Checktrade Pharma, taga Cagayan de Oro apan anaa sa Surigao City dihang nahitabo ang magnitude 6.7 nga linog niadtong Biyernes sa gabii.
Gibutyag ni Navales sa SunStar SuperBalita nga bag-o lang siya naka-check in sa Le Chard Bed and Breakfast sa Surigao City niadtong higayona.
"Naa ko sa hotel inside my room Dios ko igo rako kahuman og ligo deretso oyog nawala dayon ang current nilopad ang tv nakadagan ko sa ubos walay tsinelas, lain kaayo akong ginhawa," asoy ni Navales.
Ang Le Chard Bed and Breakfast duol lamang sa ParkWay Hotel nga nahi-agom usab og kadaut.
"Na grabe ka daghan damages tanan tv sa 2nd floor nang lupad, ang glass nga mga doors, windows basag tanan, naukab mga pultahan, baso, plates basta mga utensils buak tanan," hulagway ni Navales sa kahimtang sa Le Chard Bed and Breakfast.
Sa pagsulat ning balita, unom ang gikumpirma nga patay ug kapin 100 ang angol.
Sa taho usab sa Caraga Regional Disaster Risk Reduction and Management Council giingong dunay tulay nga nahugno, pipila ka mga dalan ang nangliki ug dili maagian, mga balay ug commercial building ang nadaut.
Sumala sa Philippine Institute of Volcanology and Seismology (Phivolcs) tectonic ang tinubdan sa maong pagtay-og nga niigo sa gilawomom nga upat ka kilometro mga alas 10:03 sa gabii.
Kini nasukod usab nga magnitude 6.7 sa pagbasa sa United States Geological Survey.
Ang gikataho nga pagtay-og natala usab sa: Intensity VI - Surigao City ug Pintuyan, Southern Leyte; Intensity V - Mandaue City, San Ricardo, Limasawa, ug San Francisco, Southern Leyte; Intensity IV - Hinunangan, Southern Leyte, ug Butuan City; Intensity III- Hibok-hibok, Camiguin, Tolosa ug Tacloban, Leyte, Bislig City, Gingoog City, Misamis Oriental; Intensity II- Cagayan de Oro City, Talocogon City, Agusan del Sur, Dumaguete City, ug Cebu City.
Matud sa Phivolcs nga ang maong linog, gilauman nga magmugna og kadaut ug mga aftershocks.
Aftershocks
Pipila ka mga aftershocks ang natala human sa unang linog.
Basi sa seismic activities nga na-recorded sa Phivolcs, 18 ka aftershocks ang natala sa rehiyon, nga dunay mga magnitudes gikan sa 2.5 ngadto sa 3.8.
Nabati usab ang mga aftershocks sa ubang mga probinsiya sulod sa Caraga region, lakip na sa Surigao del Norte ug Dinagat Islands. (uban sa SunStar Philippines)