LABING sayon ang pagbuhat og sayop. Mao nga kanunay lang intawon natong mahibal-an ang pipila nga nasikop gikan gapatuyang sa ilang daotang binuhatan. Bitaw, bisan gani ang nanumpa isip atong mga sinaligan sagad mao’y niunay og lapas sa balaod nga ilaha untang gipanumpaan nga ipatigbabaw.
Maubos usahay ang atong panan-aw sa kagamhanan kon padayong magpabadlong ang uban nila. Gahinanggaw sa ilang kaakohan, pananglit, ang 16 ka sakop sa kapolisan sa lalawigan sa Sugbo nga gipasanginlang nalambigit sa pagpanalipod sa mga sugalan lakip pod sa patigayon og ginadiling mga druga.
Gikataho nga gisukit-sukit na ang 16 ka mga tigpatuman sa kahapsay ug kalinaw ubos sa Cebu Provincial Police Office (CPPO), gawas sa pagpahamtang nila og usa ka “lifestyle check and spiritual counseling.” Pinaagi sa pagsumpo sa ilang buloyagon nga panginabuhi dugang sa diniyos nga pagtambag sa usa ka pastor nga nga mao’y coordinator sa tulomanon nga gitawag og “Bless Our Cops,” basin pa diay mausab pa sila. Dili pa ulahi ang tanan kay mahimo pa silang magtinarong.
Matul-id pod ang patay, sumala sa pangatarongan sa mga magbabalaod diha sa Kongreso nga buot mopalusot sa death penalty alang sa mga binilanggo. Pastilan, sayod ta nga sagad sa mga nahukmang sad-an mao ang mga kabos nga dali rang pasanginlan, galisod pod pagbayad og abogado nga sarang nilang manalipod. Tinuod baya nga ang kalisod sa kinabag-an gisamotan pod sa kakulang sa kaangayan.
rMao’y hinungdan nga supak gyod si Representative Raul del Mar (Cebu City, North District) sa silot nga kamatayon. Humok rang mahukmang sad-an bisan anga wa’y sala diin kusgan ang sapi nga samot gapahuyang sa criminal justice system sa nasod. Kay dali rang suholan ug sulsolan ang ubang sakop sa kapolisan ug hukmanan, gitataw ni del Mar nga “barbaric, antiquated, and regressive” kun linuog, kinaraan, ug baliktad ang death penalty. Kini dili mao’y tukmang paagi sa pagpakgang sa salaod kun kriminalidad, segun sa napamatud-an nga kasinatian sa laing mga nasod dugang sa mga masiksikon nga pagtuon sa matuod.
Bakak ug pataka nga yawit— wala na’y paglaom nga mausab pa ang atong criminal justice system. Kay mahitabo ang pagbag-o ug pag-uswag niini, pahiuyon sa tinarong nga pangagamhanan, kon ang kalapad sa panglantaw sa atong mga kadagkoan tugbangan pod sa ilang mapangahason ug mamugnaon nga paningkamot. Aron dili sila maungot sa mga kabilinggan tungod sa mga panghunahunang wa’y pulos, mopadayon ta sila og pangita’g paagi nga pinasikad sa matarong, maalamon, ug mabungahon nga paninguha. Bahala’g hinay-hinay lang, bahala’g lisod. Labing sayon baya ang pagbuhat og sayop. Apan makadugang lang sa naandang sayop ang pagbuhat og sayon.
(geemyko@gmail.com)