Carmelo D. Lariosa
Panadtaran, San Fernando, Cebu
“HOY, SANDRO! Naunsa ka tawon, Dong, uy? Nakigrelasyon ka man anang dalaga ni Sonia nga buta! Unsa man, wa na kay laing nakit-an? Mora mag ikaw hinuoy nabuta!” mitaas ang tingog ni Upeng, inahan ni Sandro, nga gibatig kalagot.
Wala motingog si Sandro samtang sila nanihapon. Gisakitan siya sa gisulti sa iyang inahan. Apan gihigugma niya si Pinky bisan napagngan kini sa kahayag. Si Pinky mao ang binuhat nga gipitik sa iyang kasingkasing.
“Gihigugma ko si Pinky, Ma,” hinay niyang tubag samtang nag-usap sa unod sa linat-ang manok.
“Dili man na ‘in-born’ ang iyang pagka buta. Karon pa man na mahitabo nga dalaga na siya. Manghilam-os man god siya matag abot niya gikan sa trabaho. Buotan si Pinky, Ma. Siya ang ‘bread winner’ sa ilang pamilya.”
“Kana si Pinky, way amahan, Sandro. Gibiyaan si Sonya sa bana-bana niyang Amerkano. Aw, guwapa lagi.
Pero mag-unsa man ang iyang kaguwapa kon di makakita, ug ikaw maoy moguyod-guyod ana niya kon manuroy mo. Unya kinsa na may mobuhi nila nga wala na may trabaho si Pinky kay buta na man?”
“Mibalik mag trabaho si Nang Sonia, Ma!”
“A, balik sa Club. Sus, wa gyud kay klarong paminsar, Sandro! Pangitag babaye nga way depekto, uy!” ni Nang Upeng nga mitindog ug mipaingon sa kusina.
Mitindog sab si Sandro ug human og inom og tubig mikanaog siya sa silong. Milingkod siya sa usa ka lingkuranan ilawom sa punoan sa nangka sa ilang tugkaran.
Sunod semana Valentine’s Day na, ug kinahanglan nga iyang isuroy si Pinky kay kanang adlawa maoy adlaw sa kasingkasing sa mga managhigugmaay.
Oo, wala na siyay laing higugmaon pang babaye gawas kang Pinky. Karong gabii mamisita siya kang Pinky.
Paghiabot niya sa balay nilang Pinky pagka gabii gisugat siya sa ig-agaw niini nga si Doray.
“Wala, wala na man dinhi si Inday Pinky, Sandro,” taho ni Doray.
“H-Hain man diay siya, Ray, nga wala man siya dinhi?” Gitutokan ni Sandro si Doray.
“Mianhi ang iyang amahang Amerkano. Gidala niya si Pinky sa Amerika aron pa-operahan ang mga mata didto,” tug-an ni Doray.
DUGAY na kadto. Daghan nang mga Valentine’s Day ang nanglabay. Apan bisan ning tanan wala gayud mangita og laing hinigugma si Sandro kay anaa ra gihapon sa iyang kasingkasing ang lunsay ug tiunay niyang gugma kang Pinky. Ug kay karon Valentine’s Day man, naghandom siya kang Pinky.
Unya may nangayog katahuran. Tingog sa babaye nga nagsangpit sa iyang ngalan. Midungaw si Sandro sa bentana, Sa tugkaran nakita niya si Pinky nga mikaway sa iyang tuong kamot. Makakita na kini kay gipa-operahan man sa amahan niya didto sa Amerika. Naaninaw niya nga misamot kini kaguwapa.
“Sandro, kumusta ka?” ni Pinky nga nagpahiyom.
“Pinky!” Midalig kanaog si Sandro. Pag-abot niya sa tugkaran wala siya makapugong. Gigakos niya ang dalaga kinsa mibawos pod paggakos kaniya sa hugot nga paggakos.
“Happy Valentine’s, Sand!” ni Pinky.
Wala makatubag si Sandro kay ang iyang mga ngabil daling miukob sa mga ngabil ni Pinky nga nagpadayon paggakos kang Sandro. (KATAPUSAN)