WA NAY contact si Aloguinsan Mayor Augustus Caesar ‘Chonse’ Moreno sa iyang asawa nga si kanhi mayor Cynthia Moreno nga nagtago-tago human nimando ang Sandiganbayan sa pagsikop niini ug sa laing pito ka mga kaubang akusado.
Si Chonse masaligon nga mopatim-aw ang iyang asawa ug motahan sa kaugalingon ngadto sa awtoridad.
“I think she needed time to adjust before she will come out. I believe she will come out soon,” butyag sa mayor sa Sun.Star Cebu.
Wa na usab siyay contact sa laing pito ka mga akusado nga sila si Municipal Budget Officer Nonela Villegas, Municipal Agricultural Officer Marilyn Flordeliza, Municipal Assessor John Lim, Municipal Engineer Orven Nengasca, Municipal Civil Registrar Pepito Manguilimotan ug utility workers Gertrudes Ababon ug Emilia Luz Celis.
Sila gikonbikto sa kasong kalapasan sa Republic Act 3019 kun Anti-Graft and Corrupt Practices Act ug Republic Act 6713 kun Code of Conduct and Ethical standards for Public Officials and Employees gumikan sa anomaluso nga pagpalit og aluminum composite panels nga way public bidding nga napahigayon.
Ang Sandiganbayan First Division nimando sa ilang pagsikop niadtong Oktubre 27, 2016 aron maserbisyohan ang ilang sentensya.