NIRAMPA sa kataposang higayon ang duha ka bayot human nabanggaan-patay sa national high way sa dakbayan sa Naga kagahapon sa kaadlawon.
Samtang laing tulo ka mga lalaki nga ilang kuyog angol human gidaro sa usa ka trak ang naka-parking nga sakyanan kilid sa dalan.
Ang nakabsan sa kinabuhi mao sila si Wendyl Lumambas alyas Wendy Lin ug Raffy Bontuyan alyas Pinky Alvarez, mga residente sa dakbayan sa Sugbo.
Matod ni PO3 Keith Nuñeza, traffic investigator kinsa nahinabi sa Superbalita Cebu kagahapon nga nagstandby ang lima kilid sa dalan sa Barangay Tinaan, Naga ang lima diin tupad kini sa nakapark nga Mitsubishi Lancer (YGV-268).
Kapin sa ala 1:00 sa kaadlawon dihang wala damha nga nibangga ang Fuso Truck (023-CEO) nga gimaneho ni Delbert Mangco sa Lancer ug sa usa ka nagpark nga Kawasaki nga motor.
Sa pakighinabi ning mantalaan kang Nuñeza, wala pa nila masuta ang rason sa pagbangga sa trak sa mga sakyanan nga nakapark.
Paingon sa habagatang bahin sa Sugbo ang truck diin aduna kini dala nga trigo.
Nasayran nga human sa insidente, niikyas si Mangco sa crime scene apan pipila ka oras dihang boluntaryo kining nitahan.
Human nibangga ang truck nga gimaneho ni Mangco, laing Mitsubishi Truck (080108) nga ghimaneho ni Alejandro Montemor ang nibundol sa nagrambola nga sakyanan.
Lakip sa naangol sila si Romolo Delgado, Joshua Baricuatro ug Adam Jay Singson, hingkod ang pangedaron.
Patay dihadiha si Lumambas diin nagrabihan ang ulo nga nabuak ug si Bontuyan gidala sa South General Hospital apan nakabsan ra kini sa iyang kinabuhi.
Usa ka suod nga higala ni Lumambas nga si Jarvz Sanchez, kinsa nahinabi sa Superbalita nitug-an nga aduna'y uyab ang duha ka mahuyang sa Naga hinungdan nga maadtoan kini.
Gibutyag usag ni Nuñeza nga disco sa gym sa maong barangay tungod kay piyesta, hinungdan nga nagstandby ang maong lima.
Natanggong karon sa prisohan si Mangco.
Samtang usa ka 7-anyos nga bata ang patay human kini naligsan og pampasahero nga bus sa Barangay La Paz, dakbayan sa Bogo.
Si Jems Menchaves Coracion naligsan niadtong Sabado sa buntag.
Nasayran nga kalit nga nilabang ang bata human kini gitawag sa iyang mga higala sa atbang niini.
Ang nagmaneho sa bus nga si Rico Ortimbac Sollano nitahan ra hinuon sa kapulisan.