SI KYZZHIA Navarro miapil sa Association for the Advancement of Karate (AAK)-Davao pinaagi sa pag-awhag sa iyang amahan.
Si Kyzzhia, 12 anyos, Grade 5 sa University of Immaculate Concepcion, usa sa upat ka gold medalists sa 2017 Adidas BMP International Karate Championships didto sa Music Hall, Mall of Asia sa Pasay City.
Nauli ni Navarro ang girls 9-11 years-old individual kata gold medal ug kumite bronze in girls 39-kilogram.
"Gusto po ni papa magkarate kami ng kapatid ko na si Seth para matuto po kami mag self-defense, pero nung pagtagal po nagustuhan ko na rin pong mag-karate," ni Navarro atol sa pakighinabi sa iyang training didto sa Beefit Gym sa Mt. Apo Street, Davao City.
Ang iyang amahan gusto magbansay siya sa AAK-Davao tungod sa kalidad sa pagbansay ug mas daghan ang giapilan nga mga torneyo.
Si Kyzzhia nagsulti nga sunod niya nga apilan nga torneyo ang sa Kota Kinabalu karong tuiga.
Sa 2016, si Navarro mihuman sa iyang SM-Milo Super Karate Kids National Invitational Championships nga duha ka bulawang medalya sa managlahing events.
Una niya nga nasungkit ang bulawan sa kata intermediate class dayon sa kumite.
Usa sab ka ballerina si Navarro.
Si Navarro, kinsa bag-o lang napromotar ngadto sa purple-belt gikan sa blue-belt, nagtinguha usab nga makaduwa sa Tokyo 2020 Olympics.
Gawas niini, buot sab niyang mahimong doktor sa umaabot nga panahon.