(Pasiuna: Kini ang atong apas sumpay sa suliran nga gipadangat kanato ni Lilac of Sta. Ana mahitungod sa iyang gusto nga makabaton ug anak, bisan pa man sa iyang pangedaron nga 50 anyos.)

DEAR Lilac of Sta. Ana,

Ug karon sa atong pagpadayon sa atong pag-atubang sa imong sitwasyon, sa niagi ato nga gihisgutan ang mahitungod sa pinakatiguwang ug pinakabata nga nahimong mga inahan.

Si Maria del Carmen Bousada de Lara ang pinakatiguwang nga naberipikar nga nahimong inahan sa pangedaron nga 67 anyos, apan pinaagi sa IVF nga itlog nga gidonar.

Ang pinakatiguwang nga inahan nga naberipikar nga nakaanak sa normal nga pamaagi, mao si Dawn Brooke nga anaa na karon sa Guiness Records nga nakabaton og anak sa pangedaron nga 59-anyos samtang kini siya nagainom og estrogen.

Apan seguro kung pangedaron lamang ang istoryahan, wala na siguroy modaug pa sa edad ni Sarah nga gipatik sa Bibliya. Kung wala ako masayop sobra na kini siya sa 70 anyos sa panahon nga nanganak kini siya ni San Juan de Bautismo.

Kini nagpasabot lamang nga walay imposible sa gahum sa Ginoo.

Bitaw, Lilac, sa imong pangedaron karon nga 50 anyos, mamahimo na gayud nga dakong risgo ang imong plano nga maburos. Tinuod gayud ang imong mga nadunggan. Ug nahimuot ako kay nakahibalo ka nga daw imposible na ang imong gusto nga latason.

Apan kung gusto gayud nimo nga latason ang daw imposible nga misyon sa imong kinabuhi, ania ang

mga puntos nga angay nimo nga ibutang sa imong alimpatakan.

Ang risgo sa mga komplikasyon sa pagmabdos nagausbaw samtang nagkausbaw usab ang pangedaron sa usa ka babaye.

Ang mga risgo nga nahilambigit niining pagmabdos nga sobra sa 50 anyos nilakip sa usbaw nga insidente sa diabetes sa panahon sa pagmabdos, alta presyon, pagpanganak pinaagi sa caesarian section, mapunitan, preeclampsia ug placenta previa.

Kung ikompara sa mga mas batan-on nga inahan, nga nagpangedaron taliwala sa 20 ngadto sa 29 anyos, ang mga inahan nga sobra na sa 50 anyos adunay hapit katuloan ka beses nga risgo nga manganak ug kubos sa timbang, wala sa saktong bulan ug kuwang pa kaayo gayud sa saktong panahon.

Apan tungod kay taas taas pa man gihapon ang atong pagahisgutan mahitungod niining imong sitwasyon, tugoti ako nga ato na usab kini nga padayunon pagtuki sa sunod nga edisyon niining atong patik. Hangtud na usab sa sunod!

Dr. Fritz

(Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor sa iyang libro nga “Healthy is Sexy Secrets ni Dr. Fritz”. Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o Sunstar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!)