ANG City Health Office (CHO) sa Davao City nag-awhag sa mga tawo nga dunay mga suicidal tendencies nga makigkita sa usa ka psychologist aron matabangan sa ilang suliran.
Si CHO Chief Josephine Villafuerte nagbutyag niini human nagpakamatay ang 20-anyos nga si Rheyn Mark S. Tubato, ulitawo, out-of-school youth, ug residente sa Kilometro 9, Sto. Niño, Riverside, Barangay Sasa ning dakbayan, nga milukso gikan sa 5ft floor sa dakong mall sa Jose P. Laurel Avenue, ning dakbayan.
Nasayran nga nakasinati og tumang depresyon ang biktima human nagsakit ang iyang amahan ug wala silay ikapalit og tambal.
Gawas sa balatian sa amahan, milayas sab ang iyang inahan sanglit nakig-uban sa laing lalaki.
Sumala ni Villafuerte nga kinahanglan sa usa ka tawo nga dunay masultihan sa problema ug di lamang kini iluom.
"Kailangan natin na may mapagsabihan tayo sa ating mga problema, ipalabas natin yan sa mapagkatiwalaan na tao, o ang mas mainam diyan lalapit tayo sa isang psychologist," sulti ni Villafuerte.
Dugang sa opisyal nga mamahimong maduolan sab ang mga social workers sa City Social Services and Development Office (Cssdo) nga maoy masultihan sa gidala nga mga suliran.
"Dapat ang mga tao na may ganitong sitwasyon na matulungan sila at alamin kung ano ang dinadala nilang problema para hindi hahantong sa pag-suicide," dugang sa opisyal.
Si Rheyn Mark ang ika-upat nga miambak sud sa susama gihapon nga mall, apan nabuhi ang usa ka 15-anyos nga babaye niadtong Nobyembre 4, 2015 human masangit sa net ug naluwas. (Jeepy P. Compio)