COTABATO CITY – Gibutyag ni Moro Islamic Liberation Front (MILF) 1st Vice Chairman Guiadzali Jaafar nga nagmugna og kaugalingong 5-man committee si Moro National Liberation Front (MNLF) Founding Chairman Prof. Nur Misuari aron makighinabi kang Office of the Presidential Adviser on the Peace Process (OPAPP) Secretary Jesus Dureza.

Kini gihimo bisan pa man nga natudlo na ni Pangulong Rodrigo Duterte ang 21 ka myembro sa expanded Bangsamoro Transistion Commission (BTC) nga maoy magtuon bag-o nga Bangsamoro Basic Law (BBL).

Dako ang pagsalig sa MILF kang Dureza nga dili magkaproblema sa namugna expanded BTC ug komitiba ni Misuari.

Kahinumdoman nga dunay mga nalatid sa BBL nga di pabor si Misuari hinungdan nga iya kining gisupak.

Girespeto sab sa MILF ang gibarugan ni Misuari apan gusto sab nila nga magkahiusa na lamang ang duha ka pundok alang sa gipursige nga kalambuan ug kalinaw sa Mindanao.

Gitakda sab nga mobisita si Dureza sa Maguindanao aron makighinabi sa mga bag-ong miyembro sa BTC ilawom sa MILF sa pagpanguna ni Jaafar. (Edgar Fuerzas)