NIBIDA na sab si Paul Lee human gisakwat niya ang iyang Star Hotshots ngadto sa 91-89 nga kadaogan batok sa Barangay Ginebra atol sa Game 2 sa ilang best-of-seven semifinals sa PBA Philippine Cup niadtong Sabado, Pebrero 11, didto sa Mall of Asia Arena.

Nitala og 17 puntos si Lee pagmartsa sa Hotshots ngadto sa 2-0 nga labaw sa siryi.

Nakonektar sa batang Tondo ang komportableng labaw ngadto sa kadaogan ang iyang dos sa 58 segundos nabilin sa dula sa iskor 89-85. Naay gamay nga oportunidad ang Ginebra nga moapas apan nagkamalas ang ilang mga itsa ug opensiba sa nahibilin nga segundos.

Si Lee gihapon ang nibayani sa Game 1 human gikonektar niya ang mantas niyang turn-around hook shot sa 24 segundos nabilin. Agresibong mipakita sab og gilas ang Kagay-anong si Jiovani Jalalon alang sa depensa sa Star.

Siya gyud ang “missing link” niadtong nabura sa Ginebra ang ilang dakong biya ug nalangkat pa ang labaw. Dako og tabang si Jalalon pag-angkon sa krusyal nga rebound pagpuli niya kang Marc Baroca ubos sa lima ka minutos nabilin. Apan, mas dako pa gyud ang suliran sa Ginebra tungod nga dili pa makabalik si Joe Devance sa dula.

Sige pa siya og paayo sa iyang injury nga nahitabo niadtong rubber match nila batok sa Alaska sa quarterfinals.