NATALA sa Philippine Atmospheric, Geophysical and Astronomical Services Administration sa 23.0 degrees Celsius ang temperatura sa Sugbo kagahapon sa alas 3:16 sa kaadlawon.
Si Romeo Aguirre, weather specialist sa Pagasa Mactan, namahayag nga kini ang labing ubos nga temperatura sa Sugbo sukad sa Enero karong tuiga.
Matod niya ang kabugnaw sa temperatura nasinati gumikan sa hanging amihan nga nagpasulabi sa tibuok nasod.
Sa kasaysayan sa Pagasa Mactan, nasukod sa 19.2 degrees Celsius ang labing ubos nga temperatura sa Sugbo niadtong Enero 16, 1992.
Niadtong Pebrero 16, 1983 natala sa ahensiya sa 34.8 degrees Celsius nga labing taas nga maximum temperature, samtang 20.0 degrees Celsius ang minimum recorded temperature sa pagka Pebrero 3, 1976.
Si Aguirre nipasabot kasagaran sa Enero masinati ang tingtugnaw sa Sugbo.
Siya nidugang sa ikatulong semana sa Pebrero magsugod na og hinayhinay ang hanging amihan ug pagka Marso magsugod ang easterlies o ang normal nga hangin nga naghuros gikan sa silangan o Pasipiko, sa dili pa ang habagat sa buwan sa Mayo.