SA makausa pa, gipamatuod na usab sa TNT Ka Tropa nga ilang mapukan ang San Miguel Beer, pinaagi sa pagkulit og 98-92 nga kadaugan aron sakmiton ang bintaha sa ilang PBA Philippine Cup semifinals series.

Human nila putla ang 11 ka sunodsunod nga kadaugan sa Beermen sa Game Two sa series, ang Texters miduso sa Beermen sa peligrusong sitwasyon pinaagi sa kombinasyon sa mga beterano ug bag-ong sinaligan aron aswaton ang 2-1 nga labaw sa best-of-seven series.

Ang beteranong si Danny Seigle kinsa ka usa ka higayona nakatapal ni June Mar Fajardo nakapakita og saktong labok batok sa iyang kanhi team.

“I’m still reliant on my veterans, but it’s a good mixture (with the young guns),” matod ni TNT coach Nash Racela. “Everybody’s trying to contribute and help the team.”

“Similar to last game, it’s still our defense,” dugang niya. “I think coach Leo did a good job adjusting his rotations, but it was good we were able to recover.”

Karong gabii, suwayan og langkat sa Texters ang unang lingkuranan sa finals sa Game Four sa Mall of Asia Arena.

Ang Sugboanong rookie nga si Roger Pogoy mipakli og 22 puntos, lakip niini ang iyang tres a naghinapos nga bahin nga naghatag sa Texters og 92-86 nga labaw sa katapusang tres minutos.

Kadto maoy naghatag og timaan sa ilang kadaugan.

Ang laing beterano nga si Nancy De Ocampo ang nangulo sa Texters nga may 24 putos ug usa na lang ka rebound ang kuwang aron kini maka double-double, tulo ka assists ug usa ka steal sa 33 minutos.

Nahimo usab nga numero unong problema sa Beermen ang ataki ni Jayson Castro apan ang gihatagan niini og prayoridad mao ang iyang pagpahimutang sa mga set plays. Siya mitapos sa duwa nga may 11 puntos, 12 ka assists gawas sa upat ka rebounds ug usa ka steal. Nangulo sa Beermen sila si Alex Cabagnot ug Marcio Lassiter nga pulos adunay tag 18 puntos.

Mga puntos:

TNT 98 – De Ocampo 24, Pogoy 22, Castro 11, Williams 11, Tautuaa 10, Rosario 9, Seigle 4, Fonacier 3, Rosales 2, Reyes 2, Carey 0, Golla 0, Sumalinog 0, Ganuelas-Rosser 0.

SMB 92 – Cabagnot 18, Lassiter 18, Fajardo 16, Ross 12, Santos 12, Espinas 8, Heruela 4, Tubid 4, Reyes 0, Agovida 0 Quarterscores: 25-30, 53-49, 72-72, 98-92