NAGKUMBOYA sila si Derrick Rose ug Car­melo Anthony sa hinapos nga bahin aron agakon ang host New York Knicks batok sa San Antonio Spurs, 94-90, kagahapon sa National Basketball Association (NBA).

Si Rose mihatag sa Knicks og 83-81 nga labaw pinaagi sa iyang layup unya giinat ni Anthony ang labaw sa lima pinaagi sa three-point bomb sa nahabiling kapin sa 3:00 ka mga minutos.

Human niini, wala na motugot ang Knicks ang mailog pa sa Spurs ang labaw hangtod na sa katapusang gutlo.

Gipangulohan ni Anthony ang kadaugan pinaagi sa iyang 25 puntos samtang nidugang og 18 puntos si Rose.

Maayo sab nga nakaduwa alang sa Knicks mao si Kristaps Porzingis, kinsa nitampo og 16 puntos.

Ang Spurs gipangulohan ni Kawhi Leonard pinaagi sa iyang 36 puntos samtang nihatag og 15 puntos si LaMarcus Aldridge.

Pistons 102, Raptors 101

NIMUGNA og 24 puntos si Tobias Harris samtang niamot og 21 puntos si Kentavious Caldwell-Pope aron pangulohan ang kadaugan sa Detriot Pistons batok sa host Toronto Raptors.

Ang three-pointer ni Caldwell-Pope sa nahabiling 13.2 segundos maoy nakahatag og labaw sa Pistons nga ilang naprotektahan hangtod na sa pagkapupos sa oras.

Ang Raptors gipangulohan ni DeMar DeRozan pinaagi sa iyang 26 puntos samtang nihatag og 17 puntos si Jonas Valanciunas.

Timberwolves 117, Bulls 89

GIPANGPUKAN sa host Minnesota Timber­wolves ang kuwangan og tawo nga Chicago Bulls sa pagpangulo nila ni Andrew Wiggins ug Karl-Anthony Towns.

Nimugna og 27 puntos si Wiggins, si Towns niamot og 22 puntos samtang nidugang og 17 puntos ug 11 ka assists si Ricky Rubio.

Ang Bulls ningkombati nga wala sila si Jimmy Butler, Dwyane Wade, Nikola Mirotic ug Paul Zipser, kinsa pulos adunay angol.

Kings 105, Pelicans 99

NAGPAKATAP og 28 puntos ug 14 rebounds si DeMarcus Cousins aron ituboy ang Sacremento Kings sa kadaugan batok sa New Orleans Pelicans.

Nailog sa Kings ang labaw sa ulahing bahin sa 3rd quarter ug wala na sila motugot nga mabawi kini sa Pelicans hangtod na sa katapusang gutlo. AP/ESL