MGA sakop sa Federation of Talisay City Urban Dwellers Association (Fetcuda) gustong langkatan si Konsehal Doroteo Emit isip chairman sa committee on housing urban poor and rural development (HURD), human nga ilang giakusahan nga nagdala og kasamok.
Samtang, si Emit walay planong mobuhi sa iyang komitiba. Nagtuo kining wala lang pahibaw-a sa tinuod ang mga sakop sa pederasyon ug ang lakang dunay sagol nga politika.
Gihulagway sa konsehal ang mga sakop sa pederasyon nga giingong wala makauyon kaniya mga dumadapig nila ni kanhi konsehal Danny Caballero ug kanhi bise mayor Romeo Villarante.
Kagahapon, pormal nang mibiya si Ma. Llura Layon sa iyang katungdanan isip representante sa Presidential Commission of the Urban Poor (PCUP) diha sa Talisay, nanamilit ug nagpasalamat ang mga opisyal ug mga sakop sa Fetcuda.
Si Layon gihatod sa mga sakop sa kahugpongan ngadto sa ilang main office nga nahimotang sa dakbayan sa Sugbo.
Apan kagahapon usab, gitunol sa mga opisyal sa Fetcuda ang ilang petition letter nga gipirmahan sa ilang mga sakop nga nag-hangyo ngadto sa buhatan ni Bise Mayor Alan Bucao nga langkatan si Emit sa iyang chairmanship sa urban poor.
Ang hangyo gipalabang pinaagi sa usa ka resulosyon sa Fetcuda nga naghangyo usab ngadto sa konseho sa pinangulohan ni Bise Mayor Bucao.
Sa ilang resolusyon ilang gihulagway si Emit nga miabuso sa gahom ug nakigkonsabo sa mga tawo nga nakahatag og kasamok sa ilang pederasyon.
Si Bucao, sa iyang bahin, niingon nga iyang basahon ang reklamo sa mga sakop sa pederasyon ug sa higayon nga iyang makita nga adunay basihanan siya nanghinaot nga boluntaryong mobiya sa komitiba ug dili na lang magpaabot nga desisyonan sa konseho.
Matod ni Bucao nga iyang paminawon ang duha ka habig apan kon hulipan si Emit sa komitiba, si Konsehal Soc Fernandez maoy iyang ihulip sa posisyon.
Si Emit nipahibawo nga dako ang iyang pagtuo nga dili kini mahitabo human ang konseho nga gipangulohan ni Bucao maoy nagsugo kaniya nga limpyohan ug tarungon ang pederasyon sa urban poor ug ang tanan niyang lakang adunay pagtugot gikan sa konseho.
Iyang gihulagway nga wala makasabot ang kinabang-an sa sakop sa pederasyon ug kini nitunga lang kagahapon aron paghatod ni Layon sa iyang buhatan sa dakbayan sa Sugbo.