TUNGOD kay nakahasol sa mga lumolupyo sa Brgy. Day-as, lungsod sa Cordova ang 10,000 Roses Cafe tungod sa pagdagsa sa liboan ka mga tawo sukad kini gibuksan, nahukman sa tag-iya ug sa kadagkuan sa lungsod nga mopahamtang og entrance fee sa mga mosulod sa lugar.
Wa pa hinuon masayri ni Miguel Cho, 29, interior designer ug tag-iya sa cafe, kon kanus-a ipahamtang sa munisipyo ang entrance fee.
Si Cho nga nahinabi sa Superbalita Cebu niingon nga nagtagbo sila kagahapon sa mga opisyal sa lungsod ug mao kini ang ilang nasabutan.
Ang kita sa entrance gamiton sa lungsod sa pagmintinar sa kahapsay sa trapiko ug kalimpyo sa dapit.
Ang munisipyo nag-andam na og official receipt alang sa entrance sa matag tawo nga mosulod.
Tungod sa kadaghan sa mga bisita, nakahasol kini sa trapiko ug sa mga lumolupyo sa dapit.
Si Cho nibutyag nga sukwahi sa nanggawas nga mga taho, di kaayo dako ang kadaut nga namugna sa kadaghan sa mga tawo nga niduaw sa iyang cafe aron pagtan-aw sa 10,000 ka puti nga mga rosas niadtong Dominggo.
Dunay mga 500 ka buwak ang nangadaut mugna sa kadaghan sa mga tawo nga nanulod.
Iyang gibana-bana nga mokabat sa 30,000 ka mga tawo ang nanuaw sa lugar niadtong Dominggo.
Sa pagduaw sa Superbalita Cebu kagahapon, nabantayan nga mas midaghan pa ang mga tawo nga ningduaw.
Nanghimakak usab si Cho nga iyang ipangkiha ang mga tawo nga nakamugna og kadaut.
Kagahapon, nangunay siya sa pag-ayo sa nangadaut nga mga lusok sa buwak ug gibutang kini niya pagbalik.
Wa usab niya sirhi ang cafe bisan pa sa pagdagsang sa mga tawo.
Wa siya magdahom nga dagsaon sa daghang mga tawo ang iyang cafe kay nakuryuso sa liboan ka mga buwak nga naatol usab sa Valentine’s Day karong adlawa.