GI-DISMISS sa Sandiganbayan ang kasong kriminal nga gisang-at sa Ombudsman batok kang Kongresista Rodrigo “Bebot” Abellanosa may labot sa City Scholarship Program sa Siyudad sa Sugbo.
Nakita sa anti graft court nga way basehanan ang sumbong batok kang Abellanosa.
Sa 10 ka pahina nga resolution sa Sandiganbayan pinirmahan ni Associate Justice Efren de la Cruz, gilibkas usab ang hold departure order nga giisyu sa korte batok kaniya.
Si Abellanosa gipasakaan og kaso ni Philip Banguiran niadtong Hunyo 29, 2011 gumikan sa kasong conflict of interest gumikan sa pagpasar og resolution aron tugotan ang mga estudyante nga makaeskwela sa Asian College of Technology International Education Foundation (ACTIEF).
Si Abellanosa trustee-president sa maong tunghaan.
Niini, ang tunghaan nakakobra og P51 milyones isip tuition sa mga bata gikan sa City Government.
Si Abellanosa sa iyang bahin nagkanayon “ God is good, God is great. God knows justice best” human siya masayod sa hukom sa Sandiganbayan.
Base sa balaod, makombikto ang akusado sa section 3(i) sa Republic Act 3019 kon Anti Graft and Corrupt Practices Act kon siya usa ka public official ug sa samang higayon member sa board, panel o grupo.
Ikaduha kinahanglan nga ang board, panel o group maoy mohukom sa pagtugot sa transaksyon.
Ikatulo mao ang akusado direkta o di deretso nga interesado para sa iyang kaugalingon nga interest sa maong transaksyon.
Apan sa hukom sa Sandiganbayan, subay sa ilang makuti nga pagsusi sa mga dokumento nga giduso sa matag kampo, wala maestablisar nga anaa ang tulo ka mga elemento.
Matod ni de la Cruz nga anaa ang first element kay si Abellanosa usa ka public officer, wa sa ikaduhang elemento.
Gipahimug-atan sa graft court nga ang pagpasar og resolution ni Abellanosa pagtugot kang kanhi Mayor Michael Rama wa maglangkob og transaksyon.
Nakita sa korte nga ang pagpasar og resolution dili makonsidera nga transaksyon o buhat ubos sa section 3(i) sa RA 3019 ug ang resolution mao lang ang pagpadayag sa ilang sentimento, opinion ug di ang pagdesisyon.
Gihulagway sa Sandiganbayan nga ang resolution di permanente sukwahi sa ordinansa hinungdan nga gibasura ang kaso sanglit ang katapusang desisyon anaa sa buhatan sa mayor.