SUSAMA sa niaging tuig, mohatag ning mantalaan og mga sugilanong gugma sa mga inilang atleta dinhi sa lokal.
Maingon nga ang volleyball court sa Don Gregorio Pelaez Sports Center mao ang pundasyon sa gugma sa magtiayon nga sila Reynante ug Dolores Rameri kay didto lage sila sige’g kita.
Broken hearted si Dolores, kinsa naila sa dalaga pa nga si Dolores Roschelle Labitad ug naila kaayo sa iyang dagnay nga Lab-lab, niadtong nag-ila sila ni Reynante, kinsa sab naila kaayo sa iyang dagnay nga Bobong.
Natagamtaman ni Dolores ang sakit nga panag-buwag niya sa usa ka basketball player nga halos dili siya maka-move on. Kay mismo si Dolores sab niadto usa ka inilang babae nga basketbolista uban ni Catrina June Pong sa dekada 90.
Apan walay bato nga magpabiling gahi sa ngalan sa gugma.
Tuig 2001, opisyal nahimong usa ka volleyball player si Dolores human midesider siyang modula sa Misamis Oriental women’s volleyball team atol sa 1st Mindanao Friendship Games didto sa Tubod, Lanao del Norte. Si Reynante naa sa men’s team niadtong tungora busa didto nagtagbo una ang ilang mga tadhana.
Didto dayon nagsugod og sige’g duol si Reynante, gapangulit nga makigstorya ug hangtod nagkasuod. Sukad ana, nagkalig-on ang ilang panaghigala apan dili sayon alang kang Reynante nga moderitso lang og dasmag panguyab kang Dolores.
Gikinahanglan ni Reynante nga komprontahon niya ang kanhi boyfriend ni Dolores aron maklaro niya ang kamatuoran ug matagaan og katin-awan.
Nabal-an niya daan nga wala sila’y klaro nga pagbuwag. Sa diha, mitubag ang kanhi boyfriend: taronga lang siya (Lab-lab) bai.
Didto na dayon nagsugod ang tanan nga naklaro ni Dolores nga manguyab na diay si Reynante kaniya.
Nisaysay si Reynante kaniya nga daan na siya adunay pagtan-aw kang Dolores niadtong gapang-eskwela pa sila sa una. Si Reynante first year college pa, samtang si Dolores naa sa second year high school sa Corpus Christi.
Nadumduman pa ni Dolores ang mga gipanumpa ni Reynante nga nagpasugot kaniya.
“Ingon siya nako nga hulatan ko niya ug kung naa na siya’y chance iya daw i-pursue,” ingon ni Dolores bahin sa giingon ni Reynante.
Gisugtan ni Dolores si Reynante niadtong Mayo 2002 ug nagminyo sila sa Hunyo 7, 2003, diin motala na sila sa ilang ika-14 nga wedding anniversary ning tuig. Naa sila’y usa ka anak nga si Franzine Ozmarah Rameri.
Naila silang duha ning panahona isip malampusong volleyball coach sa Angelicum Learning Center ug sa Team Cagayan de Oro.
Naay mga pulong si Dolores kang Reynante: To my bestfriend, teammate, my coach, my trainer, my setter and my husband, thank you for the unconditional love you've given me and to Frankie. You showed me more reasons to love you more everyday. Thank you so much honey. I am lucky to have you as my husband. Happy Valentines honey.
Sekreto sab gikuha ning mantalaan ang mensahe ni Reynante alang kaniya: Salamat sa tanan, mag 14 ka tuig nata magkauban. Anaa gihapon ka sa akong kiliran labina na sa pagtabang nimo sa pag pag-atiman nimo sa atong mao maong bata nga imo gipadako nga naa na'y pagsalig sa Ginoo.
“Kung dili gyud tungod sa sport dili gyud ta unta mag kaila. Manghinaut unta ako nga dili ka masumhan pagtabang sa ako. Thanks sa tanan ug ikaw akong amiga, akong asawa ug partner sa tanan,” dugang ni Reynante.
Sa ilang panagkuyog sa ilang gugma sa sport nga nag-ila sila, ubay-ubay na mga batan-on nga ilang naduso ngadto sa kadalaing kolehiyo sa UAAP sama sa Far Eastern University ug University of Santo Tomas.
Sa usa na sab ka madrama nga sugilan, nagdula si Rey Dangcal sa iyang kataposang tuig sa San Juan de Letran Knights alang sa NCAA collegiate basketball didto sa kaulohan.
Nagdesider siyang mouli kadyot sa iyang yutang natawhan sa El Salvador, Misamis Oriental aron magbakasyon ug moduyog sa kapaskohan ug bagong tuig sa iyang pamilya.
Apan wala damha sa alas-6 sa gabii sa ika-27 sa Disyembre 2008, gisalubong siya og usa ka aksidente nga siya nag-angkas sa motor sa iyang ig-agaw. Paingon unta siya modula sa bando sa iyang mga suod nga mga higala sa usa ka liga.
Nganha, niangkon siya og seryusong pag-angol ug hulga sa iyang kinabuhi.
Duha ka bulan siya naplastar sa intensive care unit ug usa ka bulan sa recovery room sa balay tambalanan.
Apan ang pinaka pait nga taho, pernamente na siya dili makadula sa sport nga naila siya. Karon, sakay kanunay siya sa usa ka electric mobile wheel chair.
Bisan sa mga paghagit ug suliran, adunay niabri kaniya nga nibuka ang iyang mga mata: gugma nga walay kondisyon ug gugma sa Diyos.
Samtang nagpa-rekober pa si Dangcal sa ospital, naila niya ang usa ka dalagang nurse nga ginganlan og Kristine nga nipitik sa iyang dughan ug nahimo niyang inspirasyon nga mobangon sa tanan hagit niyang naagian.
Wala magdahom si Dangcal nga sa iyang pagkakulit masuod niya ang dalaga ug nahimo niyang kaipon karon sulod sa sobra pito ka tuig.
“Didto nako naila siya. Siguro, God’s will ug aduna gyud rason nganong naila nako siya maskin ako wala nako masayod giunsa nako pagpanguyab niya. Siguro, God has a reason and has something to do with our relationship,” ingon ni Dangcal.
Ingon pa niya nga basin ang Gingtas-an ang nagmugna sa ilang relasyon ug nagkalig-on hangtod karon sukad gisugtan siya niadtong 2009.
“There is no perfect relationship. There is always ups and downs but at the end of the day we are staying together with loyalty and faithfulness,” pahayag ni Dangcal.
Mao ni ang iyang ikaingon ning adlaw sa gugma: Life is like the movies, written, produced and directed by God. It is a one take movie, so make it a blockbuster. If in a romantic picture, make it a beautiful romance!
Taliwala sa iyang stado, nagmalampusong basketball coach siya sa Southern de Oro Philippines College (SPC) Sharks ug nakatukod sila og usa ka beauty salon dinha sa Center Point sa Corrales Avenue.
Sa iyang paghawid sa SPC, naangkon sa Sharks ang ika-duhang sunod-sunod nga titulo sa PCCL-Cagayan de Oro Basketball Federation.