NAGLASONG ug gisukmag sa babaye ang iyang uyab human kini wala hatagi og kwarta sa hinigugma niadtong milabay nga adlaw samtang anaa sulod sa Coop diha sa Yacapin corner Tiano Street ning dakbayan sa Cagayan de Oro.

Ang biktima nga nagpatala nailang si Arman (bansagon gitago), 35, taga Zone 12, Upper Carmen samtang ang hinigugma nailang si Jackielyn (bansagon gitago) nga taga Pinikitan ning dakbayan.

Sa impormasyon nga nahipos gikan sa buhatan sa Police Station 1 sa Divisoria, gikabutyag nga samtang anaa sulod sa usa ka Coop ang maong biktima kalit lang ni-abot ang iyang hinigugma ug gisukmag ang biktima.

Giingong nangayo kini og kwarta apan gibalibaran sa biktima hinungdan nga nasuko kini kaayo ug kalit nga gisukmag ang biktima ug naglasong pa kini sa maong dapit diin daghan ang mga nakasaksi sa maong hitabo nga gika-ulaw sa biktima.

Gidugang pa nga iyang giguba ang mga accessories sa motorsiklo niini ug lakip nga giguba ang cover sa maong motor ug mga wires ug dali ra usab kini nga nahanaw sa maong dapit.

Samtang sa bahin sa babaye giingong nangayo kini og kwarta tungod kay isip suporta sa ilang anak.

Sa pagkakaron, nakatala na sa buhatan sa kapolisan ang maong insidente ug giduso na sa tinugyanan sa Barangay Lupon alang sa tukmang disposasyon.