POSIBLENG linya sa kuryente ang hinungdan sa kalit nga pag-ulbo sa kalayo nga milamoy sa usa ka panimalay niadtong Dominggo sa hapon, Pebrero 12, sa Zone-2, Upper Bulua, dakbayan sa Cagayan de Oro.

Mokabat ngadto sa P200 mil ang natalang danyos sa pagkaugdaw sa panimalay sa pamilya Cenas.

Sa impormasyon gibutyag ni Apple, ang tag-iya sa panimalay, nga posibleng linya sa kuryente ang hinungdan sa kalayo nga nagsumikad mismo sa ilang lawak.

Gibutyag niini nga niadtong milabay nga semana adunay gihilabtan ang iyang bana sa linya sa kuryente sa maong lawak ug gani nakatimaho na kini kaniadto og baho sa sunog apan gibalewala lang hangtod na lamang nga adunay kalit nga misilaab diin mao kadto ang gitoohan nga hinungdan.

Samtang mokabat usab sa P80 mil ang natalang danyos sa sunog sa buhatan sa Department of Public Works and Highways gumikan sa mga aligato sa sunog sa maong dapit tungod kay nipabor man sa maong buhatan ang hangin ug nakapaingon sa atop sa maong buhatan.

Sa pagkakaron, padayon pa ang tinugyanan sa Bureau of Fire and Protection sa pag-imbestiga sa tinuod nga tinubdan sa maong kalit nga pag-ulbo sa kalayo.