HAPPY Valentine's day sa tanan! Adlaw sa gugma ug sa kasingkasing nga nag-uros-uros ug puno sa pagbati.
Kadtong walay partner karon moadto lamang sa People's Park kay basin pa'g makabangga og susamang nag-inusara sa kinabuhi. Di na man uso ang firing squad karon, puwede na silang ma-lethal injection kon molusot sa Kongreso ang pagbalik sa “death penalty” sa nasud.
Nanghingusog karon ang liderato sa Kongreso nga iduso kini ug kadtong mga kapartido nga dili mosunod kay puwede nang mamutos ug mohawa sa partido o sa “super majority.”
Gawas sa pagpabalik sa death penalty, posibleng ibalik usab ang Minimum Age of Criminal Responsibility ug ang mandatory Reserved Officer Training Course (ROTC) sa mga estudyante.
Gimugna ang ROTC isip paagi sa gobyerno nga makatapok og reserbang puwersa sa Armed Forces of the Philippines (AFP) nga puwedeng tawagon kon may dakong hadla sa seguridad sa nasud.
Kon wala ko masayop, gitangtang ang ROTC niadtong 2001 nga gihulipan og laing programa nga mag-andam sa kabataan nga makaserbisyo sa nasud dili lamang sa seguridad kon dili sa uban pang natad sama sa edukasyon, katungod sa kabataan, kinaiyahan, panglawas, ug uban pa.
Gitangtang usab ang ROTC tungod sa mga pagpang-abuso nga natala sulod sa maong kurso ilabi na kung kurakot ug bunguton ang lideres niini.
Nahimo sab kining gatasan sa pipila ka opisyal nga gigamit ang ilang gahum aron makapanguwarta pinaagi sa pagbaligya'g ticket sa bisan unsang pasundayag, proyekto nga walay klaro ug daghan pang porma sa pagpanguwarta.
Gigamit sab ang ROTC sa pagkastigo aron mosunod ug mahimong itoy ug di mangutana ang bata sa panghitabo nga iyang makita sa palibot.
Tungod niini, walay nahimuot nga ibalik kini gawas lamang tingali ni Presidente Rodrigo Duterte ug sa iyang militarista nga adviser nga buot himuong estadong militar ang Pilipinas sa pagsumpo sa hadla sa seguridad gikan sa Islamic State (IS).
May punto man sab ang presidente apan unta dili kini mandatory, kon dili kadto lamang gusto nga mahisakop sa armadong puwersa ug buot moapil sa giyera.
Tinuod ang hadla sa IS sa nasud apan para kanako dili tubag ang ROTC kon dili ang pagpalig-on sa atong kasamtangang AFP ug Philipine National Police, wala pay labot ang libuang mga para-military groups nga gitukod sa pagsumpo sa rebelyon sa nasud.
Kon maangkon lang kining kalig-on, way duda nga masulbad nato ang hadla sa IS. Kinahanglan bang ilawog nato ang atong mga kabataan tungod kay dili masulbad natong mga hamtong ang problema sa atong panahon?
Ang pagsulod sa IS ug sa dili masumpo nga krimen sa nasud dili hinimuan sa kabataan, hinunua biktima sila sa pagpasagad natong mga hamtong ilabi na sa atong niagi ug masamtangang lideres nga nagpahimulos lamang sa gahum ug walay bag-ong mahatag sa katawhan.
Nganong hangtud karon nagsalig ra gihapon kita sa Amerika sa atong mga armas ug abilidad sa paggiyera bisan kung sobra 100 ka tuig na kitang ilang alyado?
Hangtud karon nagmantiner gihapon kita'g tora-tora ug mga surplus nga kagamitan sa giyera mao nga di kita makabuntog sa bisan unsang hadla sa seguridad.
Way kapadulngan ang pagbalik sa ROTC kon dili dugang kabangis sa atong kabataan.