DAVAO DEL SUR - Gipakusgan sa Davao del Sur Provincial Police Office (DSPPO) ang intelligence monitoring human nakadawat og bahad nga mohimo og kasamok ang mga rebeldeng New People's Army (NPA) sa bisan asang bahin sa probinsya.

Adunay hungihong gikan sa walhong komunista nga ang sparrow units ipakatap sa matag kalungsuran aron mohimo og panabotahe, hinungdan nga maghimo og mga checkpoint sa national highway sa dakbayan sa Sta. Cruz.

Si DSPPO Provincial Director Samuel Gadingan nagmando sa tanang hepe nga dili mokompiyansa aron di malutsan sa mga rebelde.

Sa usa ka text message nga nadawat sa SunStar SuperBalita gikan kang Kumander Abet sa NPA-Southern Mindanao, giangkon niini nga dismayado sila sa nahimong desisyon ni Presidente Rodrigo Duterte ngadto sa pagbakwi sa hinabing kalinaw.

“Gipaminaw niya ang iyang mga sundalo nga maoy nakahunong sa ceasefire bisan og ang mga sakop sa 39th IB maoy nanguna sa pagpanulong sa among kampo,” sulti ni Abet.

Giangkon sa NPA nga kanunay silang nangandam sa bisan unsang plano kanila sa gobyerno ilabi na ang “all-out war.”

Hinuon, mas hugot sab ang pagpaniid sa mga tropang militar ug padayon nga gihimo ang pagpatrolya sa kabukiran aron mapakgang ang mga dautang plano sa mga komunista.

Nanawagan sab ang kapolisan ug kasundalohan ngadto sa publiko nga di magpadala sa mga hulga sa mga rebelde ug itaho dayon kanila ugaling mamatikdan ang presensya niini sa ilang mga dapit.