ANG Bureau of Jail Management and Penology-Davao Region nagpahigayon og Oplan Greyhound sa Davao City Jail diin narekober ang nagkadaiyang gamit nga gidili sud sa selda niadtong Lunes sa buntag, Pebrero 13.
Si Davao City Jail Warden Superintendent Grace Taculin nagbutyag nga usa ka joint-operation ang nahimong Oplan Galugad nga gilangkuban sa Philippine Coast Guard, Philippine National Police, Task Force Davao, Philippine Drug Enforcement Agency, K9-Units ug Barangay Maa.
“Naa ta'y narekober nga suspected nga drugs, pero ato pa gyud ning ipaagi sa examination ug diha pa nato maingon nga ilegal nga druga kini kung mogawas ang result,” sulti ni Taculin sa mga tigbalita.
Sumala ni Taculin nga ang Oplan Galugad sa Davao City Jail di susama sa Oplan Galugad sa dakong prisohan sa nasud nga dunay mga high-powered firearms, dakong kantidad sa salapi ug mga droga.
“Sa Maa Jail, lesser lang kaayo ug mga minor lang nga mga gamit nga bawal sa sulod ang nakuha,” butyag ni Taculin.
Mga narekober gilangkuban sa charger sa cellphone, sigarilyo, bakus, mga lansang, lighter, martilyo, kutsara, ballpen, long toothbrush, improvised heater, braha, 88 ka mga hait nga butang, ug 22 ka mga scrap metals.
Ang maong prisohan dunay 3,061 ka mga piniriso ug gilaumang ipangbalhin ang uban niini sa ilang bag-ong pagatukuron nga jail facility sa Barangay Wangan, Calinan District, ning ikaduhang kuwarter ning tuiga.