HUGOT nga gibantayan sa Davao City Police Office (DCPO) ang mga lodging house ug mga motel aron di kasulod ang mga menor de edad.

Si DCPO spokesperson Catherine dela Rey nagbutyag nga di lamang panahon sa Valentine's Day ang ilang pag-monitor sa mga lodging houses apan tibuok tuig nila kining ginahimo.

“Whole year nato kining gimonitor aron di kasulod ang mga menor de edad,” butyag ni dela Rey nga nahinabi sa SuperBalita niadtong Lunes, Pebrero 13, pinaagi sa telepono.

Dugang sa opisyal nga laumang dunay mga menor de edad nga mosulod sa mga lodging houses karong adlawa, apan di kini mahitabo gumikan sa mga naka-deploy nga mga pulis.

“Nakahibalo na daan atong mga establishments (lodging houses, motels) nga bawal gyud sila magpasulod og mga minors kay naa gyud ni sa atong balaod,” ingon ni dela Rey.

Sumala sa opisyal nga puwedeng makasuhan ang establisyemento sa paglapas sa Republic Act (RA) 9208 kon Anti-Trafficking in Persons Act of 2003 samtang ang nagdala sa menor de edad makasuhan og pagsupak sa RA 7610 kon Child Abuse Law.

“Atoa man gyud ning i-rescue ug atong makasuhan ang establishment ug ang nagdala sa minor,” pung ni dela Rey.

Andam ang Women and Children's Protection Desk (WCPD) sa DCPO sa pag-rescue sa mga menor de edad ugaling makaabot kanila ang report gikan sa mga front desk officer sa maong mga establisemento.

Sa talaan sa WCPD sa miaging tuig, dunay 17 ka mga biktima sa human trafficking ang na-rescue sa kapolisan diin sagad kanila, gisulod sa mga lodging houses ug motel una paman sila dalhon sa laing lugar.