GUSTONG Ipatuo ni Cong. Art Yap (Bohol, 3rd district) nga way bulok politika ang iyang pagtabang sa mga proyekto sa mga distrito gawas sa Tersero Distrito. Apan dunay pangutana si Cong. Aris Aumentado (Bohol 2nd district) kaniya. Kon way pamolitika kining iyang gihimo sa mga proyekto sa ubang distrito sa Bohol, nganong wa man lang siya mo-coordinate sa iyang opisina sa mga proyekto sa Segundo distrito? Nganong nagbuot-buot man lang siya og panghilabot sa mga proyekto bisan kon anaa na kini sa Segundo Distrito, dugang pa ni Cong. Aris.
* * *
Sa akong nahibaw-an, daghang pamakak nga gihimo na kini si Cong. Art Yap. Misaad kini siya nga mohatag og pahat sa iyang “pork barrel” alang sa Barangay Cansibao, Valencia, Bohol atol sa usa ka programa sa barangay nga akong gitambungan. Tambok kaayo ang mga pulong nga gibuhian ni Cong. Art Yap niadtong panahona nga buhian niya ang pundo gikan sa iyang “pork barrel” alang sa maong barangay. Apan miabot na lang ang eleksiyon sa 2016, wala matuman ang maong saad.
* * *
Sa iyang paglansad isip Congressman kaniadtong 2010, misulti siya kang kanhi Cong. Boy Jala nga modagan lang siya sa usa ka termino. Inig kahuman sa usa ka termino, moundang na siya ug di na modagan pa. Bakak gihapon kini sanglit wa man tumana ni Cong. Art Yap ang iyang gisulti. Daghan usab siya og gisaaran nga mga barangay nga hatagan sa mga proyekto. Apan ang iyang saad nagpabilin nga saad ug wa matuman. Unsay itawag nimo sa usa ka tawo nga kanunay mamakak?
* * *
Isog kaayo kining mayora sa usa ka lungsod. Bisan sa iyang pagka-mayor nga daghan ang nakaila kaniya, wa siyay panagana nga nakig-holding hands sa iyang gikabaniog nga uyab sa usa ka inila nga spring resort. Minyo ang gikabaniog nga uyab nga usa usab ka kagawad sa lungsod. Samtang ang mayora asawa sa usa ka iladong politiko sa probinsiya. Ang nakapait pa kay nakuhaan sila sa hulagway ug ang hulagway nagsuroy-suroy na karon sa kalibutan sa Facebook.
* * *
Hinuon, di kay una kining higayon nga nakita sila nga nag-PDA. Sa dihang mibiyahe silang duha sa usa ka isla, aksidente nga nakulob ang ilang gisakyan nga sakayan. Abtik kaayo ang uyab nga kagawad sa pagluwas sa mayora nga nagkapa-kapa sa dagat. Swerte nga duol na sila sa baybayon sa isla ug dali ra nila kini nga gilangoy. Wa na matingala ang mga taga-isla nga nakakita sa duha nga naggakos samtang nakighinabi kanila. Siyempre, di sila gusto nga mabisto ug maoy hinungdan nga nagpabaha sa ayuda ang mayora sa isla.
* * *
Gi-dismiss sa Quezon City Prosecution Office ang kaso nga libel nga gisang-at ni Cong. Rene Relampagos (Bohol Ist District) batok kang OIC Gobernor Victor de la Serna ug publisher Johnny Orioque. Wa mouyon ang City Prosecutor sa Quezon City sa gisulti ni Relampagos nga gipakauwawan siya ni Dela Serna ug Orioque sa dihang gimantala sa usa ka tabloid sa Bohol ang hulagway ni Relampagos ug gibutangan og caption nga “technically at large” human mopagawas og warrant of arrest ang Sandiganbayan. Way malisya ang pagmantala ug wala makahatag og rason si Relampagos nga adunay malisya sila si Dela Serna ug Orique batok kaniya. Tungod niini, gibasura ang kaso nga libel.