GISAULOG kagahapon ang Valentine’s Day. Namatikda nga daghan ang komersyal nga mahitungod sa gugma.
Gugma nga sama sa usa tsokolate: tam-is ug lami, apan aduna pud nga tsokolate nga pait, mahal ang presyo ug labi sa tanan way lami sama sa gugmang giatay.
Ang gugmang giatay o giatay na ang gugma kay usa kini ka ekspresyon nga nag pasabot nga nahigugma ka sa tawo, apan kahibalo ka wala gyod kay paglaum nga magkakamo.
Daghang klase sa gugma: gugma sa Ginoo, gugma sa pamilya, gugma sa higala, gugma sa kapikas, ug uban pa. Pirmi lang in good mood, inspirado, ug malipayon. Pipila lang ni sa timailhan nga ang tawo in love o gugmahan. Apan giatay ba kaha ang gugma?
Maka ingon tag giatay ang gugma tungod sa atong nasinati.
Kon makakita tag magtiayon nga sweet kaayo, masina ta magtan-aw. Maghinaot nga adunay pud tay “the one”—the one that could complete the missing piece of our heart.
Igo nalang ta magtan-aw nila dayon ingon “magbuwag ramo!” kay ang tawo nga atong gusto wala man nagka gusto nato. Pagka pait!
Ato pud hunahunaon nga adunay rason kon ngano wala nagka gusto ang tawo nga atong hinigugma.
Dili ta angay maggukod sa tawo nga kusog mo dagan kay dili gihapon ta makaapas. Dili kinihanglan nga ta mag usik og oras ug kusog sa tawo nga walay interest—masakitan ug kapoyon ra ta.
Usa pod, nganong pangitaon man ang gugma nga moabot raman na sa saktong panahon? Love strikes in an ordinary day, matod pa sa short film nilang Kaye Abad ug Paul Jake.
Ang gugma bisan asa ra makita, depende rani unsaon nato pagdala. Higugmaon nato ang atong kaugalingon ug atong pamilya aron ang uban mahigugma pud nato.
Dili ta angay magdali nga mangita og paris kay basin sa ulahi kita mailad ug masakitan. Ngano mangita man ta sa gugma sa uban kon adunay mahigugma nato?
Ang gugma dili giatay kay kita ang magdesisyon kon unsa atong pilion ug asa ta malipayon.
Sama rana namili tag tsokolate nga mahalon pero way lami ug tsokolateng baratohon apan tam-is ug lami. Josua Ronmiel Eras