NATABLA ang ikapito ug katapusang duwa ni Rommel Ganzon batok sa samang niyang National Master nga si Mario Mangubat apan igo na kini aron iyang makuha ang titulo sa Rose Pharmacy Chess Classic niadtong Dominggo sa Knight Attack Chess Cafe sa Robinsons Galleria-Cebu.

Si Ganzon nihuman sa 7-round Swiss system nga torneyo nga wala’y pilde. Nakatigom siya og 6.5 puntos aron ibulsa ang labing dakong ganti nga P5,000.

Niangkon sa ikaduhang dapit mao si Edsel Montoya, kinsa nakaha­kot og 6.0 puntos. Si Mon­toya midaog sa iyang ka­­ta­­pusang tahas batok kang Crisanto Tan.

Nahiluna sa ikatulong dapit mao si NM Merben Roque, kinsa adunay 5.5 puntos. Midaog sab si Roque sa iyang katapusang duwa batok kang Arnolito Cadiz.

Si Mangubat natanggong sa four-way tie sa 5.0 puntos kauban sila si Venancio Loyola, Bryelle Arellano ug Erwin Ababat.

Sa pagbuak sa panagtabla, nakuha ni Mangubat ang ikaupat nga luna, ikalima si Loyola, ikaunom si Arellano ug ikapito si Ababat.

Mokompleto sa top 10 mao sila si Arnolito Cadiz (4.5), Crisanto Tan (4.5) ug Anthony Makinano (4.0).

Nahimong posible ang torneyo sa paninguha ni chess patron Boogie Lim inabagan ni Cebu Executives and Professional Chess Association (Cepca).