NAGPAUWAN og three-point bombs ang host Denver Nuggets aron pakagingon ang grabe ka inilog nga Golden State Warriors, 132-110, kagahapon sa National Basketball Association (NBA).
Ang Nuggets nakatabla sa rekord sa padaghanay og tres sa usa ka duwa human sila nakapasulod og 24 ka mga itsa gikan sa rainbow territory.
“Once we saw a few go in, we just wanted to keep going, see how many we could hit,” matod sa usa sa mga tirador sa Nuggets nga si Will Barton kabahin sa ilang three-point shooting.
Ang Warriors mas naila nga kusog mopauwan og tres apan ning kombatiha, walo ra ka three-point shots ang ilang napasulod sa 32 ka mga pagsuway. Nalupig sila sa Nuggets sa kinaham nilang klase sa duwa.
“We just wanted to get after them, challenge them on offense and defense. It just so happened that we hit a lot of 3s. So, we just kept rolling with it,” dugang ni Barton.
“But we never come into a game, especially with a team like that and just want to outshoot them from beyond the arc because that’s what they do.”
Ang Nuggets gipangulohan ni Juan Hernangomez pinaagi sa iyang 27 puntos lakip na niini ang unom ka tres, nidugang og 24 puntos si Barton lakip na niini ang upat ka tres samtang nitampo si Jameer Nelson og 23 puntos lakip na niini ang lima ka tres.
Aduna pa’y dugang upat ka mga magduduwa ang Nuggets nga nakamugna sa tres.
Ang Warriors wala nakasugakod sa grabe nga gipakita sa Nuggets sa initsahay.
Hasta ang usa sa labing hinigo sa Warriors nga si back-to-back MVP Stephen Curry wala nakaparang sa surpresang sharpshooters sa Nuggets.
Si Curry usa ra’y napasulod nga tres sulod sa 11 ka mga pagsuway.
“I felt confident, every shot I took felt like it was going in,” matod ni Curry. “Just got served a humble slice of cupcake.”
Natablahan sa Nuggets ang rekord sa Houston Rockets sa padaghanay og tres sa usa ka duwa dihang napasulod ni Hernangomez ang katapusang tres sa Nuggets sa nahabiling kapin sa 2:00 ka mga minutos.
Aduna unta’y dakong kahigayunan ang Nuggets nga mabuak ang rekord sa Rockets apan nasipyat sila sa ilang katapusang duha ka mga itsa sa three-point land.
“Every time somebody shot, it just felt like the ball was going in,” matod ni Gary Harris. “It’s crazy.”
Ang Warriors, nga ningkombati nga wala ang usa sa ilang mga torador nga si Klay Thompson, gipangulohan ni Kevin Durant pinaagi sa iyang 25 puntos. ESL/AP