VALENCIA, Bohol - Dead on arrival(DOA) sa pag-abot sa tambalanan ang usa ka dos anyos nga bata human kini nadasmagan sa usa ka trak de pasaherohan ug milagpot didto sa nasudnong dan sa Barangay Canduao Occidental, lungsod sa Valencia niadtong Sabado sa hapon.
Giila ang biktima nga si John Resti Lagat, 2 ug residente sa nahisgutang lugar.
Sa pasiunang pakisusi sa kapulisan nasayran nga samtang ang trak nagdagan gikan sa siyudad sa Tagbilaran.
Pag-abot sa lugar nga nahitaboan, giingong kalit nga milabang ang bata hinungdan nga wa na madali sa drayber ang pagkontrolar sa break sa trak ug nadasmagan ang batang biktima.
Tungod sa kakusog sa impak sa pagkabangga, milagpot ang biktima ngadto sa moabot 12 ka metros palayo gikan sa gibanggaan nga lugar.
Gidala ang biktima sa Guido Lim Hospital and Clinic apan gideklarar nga DOA sa tambalanan tungod sa mga seryusong angol nga nahiaguman sa bata.
Giila ang drayber sa trak nga si Delfin Deligos, 43, minyo ug residente sa Barangay Mayuga, lungsod sa Guindulman.
Ang trak de pasaherohan nga Clynn gipanag-iya sa usa ka Seigfred Unajan nga taga Poblacion Sur, lungsod sa Carmen.
Boluntaryong mitahan sa kaugalingon ang drayber sa trak ug kasamtangang anaa sa poder sa kapulisan.