NAKAKUHA og tulo ka adlaw nga temporary restraining order (TRO) ang Banco de Oro gikan sa Regional Trial Court nga nagpugong kang Mayor Tomas Osmeña paghimo og mga lakang batok sa pagpasira sa ilang mga sangang buhatan sa dakbayan.

Ang kampo sa BDO nidangop sa korte aron pag­pangayo og tabang para aksyonan ni Osmeña ang ilang aplikasyon alang sa business permit sanglit ang mayor nibutyag nga di niya isyuhan og permit ang tanang branch sa BDO sa siyudad.

Ang BDO niduso sa ilang mga dokumento nga gikinahanglan para mabag-o ang ilang permit apan wa kini hatagi og aksyon ni Osmeña human iyang nadiskobrehan nga tag P6 ra ang business tax sa BDO Magallanes matag adlaw.

Taliwa sa TRO, ang mayor nagkanayon nga wa na siya matingala nga nakakuha og TRO ang BDO apan iyang gibutyag nga seryuso siya sa iyang nahiunang desisyong pag­­pasirado sa branch ug isunod ang ilang laing sangang buhatan.

Hinuon wa pa nibutyag si Osmeña kon iya bang patak-opan ang BDO Magallanes branch inig labay sa 72 oras nga TRO gikan sa korte.

Iyang gihagit ang tagdumala sa BDO sa pagpangita og laing banko nga nagbase sa siyudad kinsa naghatag og buhis nga ubos pa sa P6 matag adlaw kay iya usab kining pasirad-an.

Matod sa mayor nga dili mabuhi ang Cebu City kinsa naghatagan og tag P12,000 ngadto sa 80,000 ka senior citizens sa dakbayan matag tuig kon ang mga negusyante sa siyudad sama sa BDO.

Iyang gibutyag nga kon dili mobayad sa hustong buhis ang maong banko mas maayo nga molayas sila gawas sa Sugbo.

Matod ni Osmeña nga iyang ipakita sa mga Sugbuanon nga mabuhi ang dakbayan bisan wala ang maong banko.