GIPILDE sa Assumption Montessori School (AMS) ug sa Cagayan de Oro National High school ang ilang kadaiyang kaatbang atol sa Loyola Cup 17-under boys niadtong Dominggo, Pebrero 12, sa Xavier University Gymnasium.

Pabiling walay tatsa ang AMS Jaguars nga adunay 4-0 win-loss record human giparot nila ang Pangantucan Community High School, 66-60.

Nitala si Milo Janao Jr., kinsa ang most valuable player sa bago nahuman nga NBTC regional finals, og 16 puntos.

Napugngan sa Jaguars ang seryusong hulga sa Pangantucan diin nidikit sila sa upat ka puntos nga biya sa ika-upat nga kwarter.

Gibalik ni Jaguars coach James Racines si Janao ug si Stanley Bedolido sa dula sa hinapos nga minutos aron mapalong ang rally sa Pangantucan.

Gawas sa Pangantucan, gipilde sab sa Assumption ang Bulua National High School, Merry Child School ug St. Mary's Academy.

Sa pikas dula, giatsa sa City High ang Corpus Christi High School agi sa 88-79 nga kadaogan.

Nibida si Alpuerto sa City High agi sa 19 puntos, samtang niabag sab sila Balo ug Gayla og 15 ug 12 puntos, sunod-sunod.

Gibantaan na ang Corpus daan nga dili magkumpyansa sa City High kay anaa sad kaabag si coach Bismark Labadan sa iyang likoran.

Nakabinat ang City High sa ilang kinataas nga labaw nga 18 puntos sa ika-tulong kwarter apan kalit lang kini naputol sa kataposang kwarter.

Nahimong duha nalang ka puntos ang labaw sa City High human mikamang og Corpus og bangis nga rally.

Apan, nakit-an nga nihuyang ang mga depensa sa Corpus ug gilangkat sa City High ang daug.

“Mora'g nahuyang ang depensa sa Corpus sa kataposan tungod sa kakapoy paglakag sa kataposang kwarter,” ingon ni Labadan human sa dula.