ILIGAN CITY -- Gisugdan na sa Iligan City Police Office (ICPO) ug sa Highway Patrol Group (HPG) ang pag-inspeksiyon sa mga sakyanan sa mga pulis nga naa sulod sa compound sa ICPO Headquarters sa Barangay Tipanoy, ning dakbayan.

Matud pa ni ICPO Operation and Plans Branch Deputy Chief Zandrex Panolong nga kabahin kini nga kalihukan sa gimando sa Philippine National Police nga “internal cleansing” human nga nalambigit ang pipila sa ilang mga personahe sa mga ilegal nga buhat.

“Mag-coordinate mi sa Highway Patrol Group to conduct inspection on all vehicles nga naa (sulod) sa camp kay among i-check ug i-validate kung katong mga sakyanan nga gigamit sa pulis ilaha ba gyud to or basin katong mga nangadakpan pero ilang gigamit for personal use,” miingon si Panolong.

Ang mga masakpan, matud pa, nga migamit sa mga sakyanan nga dinakpan tungod sa mga nahimong kalapasan sa balaod “will be sanctioned and will be charged administratively,” miingon ang nasangpit nga opisyal.

Duha ka semana na'ng nagpatuman ang ICPO sa kamandoan ug miabot na sa kapin gatus ka mga sakyanan ug mga motorsiklo ang ilang nasusi.

“Last week, nag-inspection mi og mga 100 ka mga sakyanan, wala tay nakit-an nga mga impounded vehicles nga gigamit sa mga pulis,” miingon si Panolong.

Ipahigayon ang inspection ka-usa sa matag semana.