KINATIBUK-AN nga 3,673 ka mga iskolar ang misaulog sa ilang Valentine's Day Martes, Pebrero 14, sa Capitol ground ning dakbayan sa Cagayan de Oro.

Kini nga mga iskolar gitawag nga IKNB kon Iskolar Ko Ni Bambi nga nagikan sa nagkalain-laing dakbayan sa probinsya sa Misamis Oriental.

Matag usa kanila adunay educational assistant nga mokantidad sa P1,700 nga niinrol sa Initao College diin moabot sa tag P2,500 ang balor sa usa ka semester.

Gibutyag ni Gobernador Yevgeny “Bambi” Emano nga napulo na ka tuig ang IKNB diin daghan na sa mga tinun-an ang natapos.

Nagsugod kini tuig 2007, diin moabot na ang iskolar ngadto sa 19 ka libo ang kinatibuk-ang nakabenipisyo sa scholarship.

Dugang ni Emano nga tungod kay wala pa siya kapikas sa kinabuhi, ang mga iskolar maoy iyang gihimong ka date sa adlaw sa Valentine's tungod kay matag tuig ang selebrasyon niini diha sa kapitolyo.

Adunay 3,173 ka mga skolar sa regular nga kurso samtang mokabat sa 500 ang out of school youth nga mi enroll og vocational.

Gisugdan ang kalihokan niadtong Martes pinaagi sa usa ka santos nga misa, dance contest sa mga skolar, magician show, ug testimonya gikan sa successful nga skolar.

Usa sab sa highlights sa kalihokan mao ang job fair ug ingon man pagpanghatag og plaque of appreciation sa mga IKNB coordinator. (SVB)