MIKAMPEYON ang Baguio National School of Arts and Trades (BNSAT), human mipwesto og ika-duha niadtong 2015, gipildi ang Calinan National High School (CNHS), 5-3, sa championship match niadtong Sabado sa 11th Davao City Baseball Cup aron maangkon ang titulo sa duwa nga gihimo sa Lt. Col. Cipriano Villafuerte, Sr. Elementary School grounds.

Si BNSAT's Jerson Simogan maoy giilang most valuable player (MVP) sa secondary division.

Ang mga teammates nga sila Jason Atawom, Salvador Bansalan, Geo Bernardino, Jimmy Camangyan Jr., Joel Camangyan Jr., Joey Camangyan, John Jericho Casinillo, John Marc Duyac, Elijah Guinita, Remar Mercadal, Mario Nisnisan Jr. ug Saide Once naghiusa aron maangkon ang kampeyonato nga idlas kaayo nila sa nanglabay nga tuig.

Si Eric Gauran ang coach sa BNSAT.

Ang Crossing Bayabas National High School (CBNHS), anaa sa ika-tulo, samtang ang Philippine Nikkei Jin Kai International School (PNJKIS), 12-2 sa ika-duha.

Ang Toril-based Bayabas Elementary School, mipildi sa Baguio Central Elementary School, 7-1, aron madepensahan ang titulo sa elementary division sa kalihukan nga giorganisa sa Datu Uchida Development Foundation, Incorporated (DUDFI), PNJKIS ug Mindanao Kokusai Daigaku kaabag ang Davao City Baseball Association.

Si MVP Jay Louie Sejalbo maoy nanguna sa tim, kaabag ang coach nga si Letecia Manito. Ubang magduduwa mao sila Kenshien Lee Ardepolla, Rimarc Berdida, Edrian Casquejo, Eugene Elicano, AJ Boy Montefalcon, Divo Ocado, Juvel Panday, Marjon Pelicano, Joel Sumael, Juantio Uganap Jr. ug Michael Utbo.

Ang ika-tulong pwesto naangkon sa San Roque Central Elementary School nga nakalingkawas sa 3-2 victory kontra PNKJIS.

Ang mikampeyon nga tim midawat og tropeyo.

Ang top four teams dunay medalya, cash prizes ugbaseball equipment sa indigay nga giisponsoran sa Tokyo Kichijoji Lions Club ug gisuportahan sa Department of Education Davao City Division Superintendent Maria Ines Asuncion. (MLSA)