COTABATO CITY -- Gisaad sa duha ka mga beauty queens nga ipromotar ang Inaul hand-woven fabric sa probinsiya sa Maguindanao.
Sumala nila ni Miss Universe 2016 candidate Maxine Medina ug Miss International 2016 Kylie Verzosa nga nindot ug lahi ang Inaul sa Maguindanao mao nga wala sila magduha-duha nga sul-obon ang gowns.
Ang bisan unsang sinina nga gama sa Inaul, sul-obon nila Medina ug Verzosa aron mailhan ang tela nga hinimo gikan sa probinsiya.
Sila Medina ug Verzosa maoy mga espesyal nga bisita sa coronation night sa Palamata Nu Maguindanao Beauty Pageant nga kabahin sa 1st Inaul Festival.
Gikoronahan isip Palamata Nu Maguindanao karong tuiga si May Jean Brillantes gikan sa Sultan Kudarat.
Samtang gipahigayon sab sa Buluan ang Sultan's Forum diin nakasentro ang gihisgutan sa kalamboan ug kalinaw sa probinsiya.
Gipahigayon sab ang Governor's Night nga gitambungan sa mga lokal nga opisyal sa probinsiya sa pagpanguna ni Governor Esmael "Toto" Mangudadatu, apil na si Nyoy Volante (Tawag ng Tanghalan Hurado), Daryll Ong (The Voice Philippines Season 2 Finalist) ug Demie Fresco (Aliw Awards 2016 - Most Promising Female Singer).
Nagpasalamat sab si Governor Mangudadatu sa mga bisita nga misuporta sa pinaka-una nga Inaul Festival sa probinsiya. (Edgar E. Fuerzas)