GISEGURO sa Davao City Police Office (DCPO) nga masikop ug makasohan ang mga tigpataya og last-two, coordinators ug financiers sa ilang gipakusgan nga "war on illegal gambling" hulip sa ilang war on drugs.

Si DCPO spokesperson Senior Inspector Catherine dela Rey nagbutyag nga di lamang last-two ang ilang gitutokan lakip na kadtong ubang mga ilegal nga sugal.

"Not only last-two ang atong gitutokan karon, apil pod ning, madjong, hantak, braha, sabong-sabong, pronton ug kining video karera," sulti ni dela Rey.

Ang opisyal nagpasalig nga mokunhod ang ilegal nga sugal sa umaabot nga mga adlaw, bunga sa ilang way-puas nga pagpanakop og mga malapason sa maong balaod.

"Mostly ang atong blotter sa operation sections ug sa sa atong mga spot reports halos apprehension sa illegal gambling," butyag ni dela Rey.

Gipanid-an sab sa kapulisan ang lihok sa mga gikatahapang nagpadagan og last-two human nasayrang ipaagi nalang sa text ang pagpasa sa mga numero ngadto sa mga coordinators gikan sa mga nagpataya.

Nasayran sab nga ipaagi nalang sab sa mga money remittance centers ang pagpadala sa mga pusta gikan sa mga nagpataya padung sa mga coordinators.

"Gipanubayan sab nato kini nga pamaagi, kay atong nasayran naa sab nagahimo niini," dugang ni dela Rey.

Mismong si Philippine National Police (PNP) director general Ronald dela Rosa ang mipagula og direktiba sa kapulisan sa nasud nga pangdakpon ang mga nalambigit sa ilegal nga sugal nunot sa mandu ni President Rodrigo Duterte.

Sa laing bahin, gitin-aw ni Philippine Charity Sweepstakes Office member of the board Marlon Balite nga molusot sa mga magbabalaod aron mahimong legal ang ilang giduso nga Small Town Lottery (STL) nga di layo sa last-two.

"Ang STL, dili rani layo sa pamaagi anang giingong last-two, ug madayon kini, makatabang sab kini sa panudlanan sa gobyerno," sulti ni Balite. (Jeepy P. Compio)