DUHA ka mga babaye ang nagbugno gumikan ilang giilugan ang usa ka lalaki nga maayong moromansa ug makighilawas ibabaw sa kama.
Ang insidente nahitabo alas 12 sa udto niadtong Lunes sa usa ka hardware sa usa ka dakong mall sa dalang Quimpo Boulevard, dakbayan sa Davao.
Alas 8:08 sa gabii niadtong Lunes, nagpatala sa buhatan sa Talomo Police Station ang usa ka Mariel (bansagon gitago sa SuperBalita), 23, promodiser, ug nagpuyo sa Barangay Catalunan Grande ning dakbayan.
Si Mariel nagtug-an sa pulis nga samtang naa siya sa trabahoan, kalit miabot si alyas Stephany, 24, usa sab ka promodiser, kinsa maoy kanhi girlfriend sa iyang uyab nga si Jack (apilyedo gitago), 23.
Giingong hilabihan ang kasuko ni Stephany kay gibulagan siya ni Jack kay di kini kabalo nga modala sa ilang paglipay ibabaw sa kama.
Dugang nasayran nga misamot ang kasuko ni Stephany dihang gisultihan ni Mariel nga nakapa-booking na sila og kuwarto sa lodging house ni Jack alang sa mainiton nilang pagsaulog sa ilang Valentine's Day kagahapon.
Sa kasuko ni Stephany, iyang gisagpa si Mariel tumong sa tuong bahin sa nawong ug gibira ang buhok hinungdan nga mibalos og dumog ang nagreklamo.
Sa kaulaw ni Mariel kay nasaksihan sa daghang mga kustomer, iyang gipatala ang nahitabo kaniya sa Talomo Police Station ug nakatakda silang mag-abot sa Barangay 74-A aron sila husayon.
Like and follow SunStar Philippines on Facebook.