NASULBAD na ni PO3 Maccor ang kaso sa pagpatay sa usa ka OFW. Ang asawa ug ang iyang kabit nga bombero diay ang nagplano sa tanan, sumala sa mga ebidensiya ug testimoniya nga nakuha sa iyang grupo sa mga ‘homecide investigator.’

Naglakaw ang pulis karon sa basa nga dalan padulong sa giabangang balay sa iyang pamilya. Gitikyop na niya ang iyang payong. Mituang na ang ulan.

Wala maghunahuna si PO3 Maccor sa nasulbad na nga kaso dihang nakatunob siya sa panit sa saging ug nalamba sa dalan.

Taymsa. Sa dili pa ta mopadayon sa unahan, sa wala pa matamaki ang panit sa saging, daghan siyag gihunahuna. Duna siyay gihunahuna dihang duol na siya sa panit ug nakahunahuna pa siya dihang nadakin-as na siya.

Unahon nako ang esena dihang padulong na siyang natumba. Gihunahuna ni PO3 Maccor kon unsay sud-anon sa iyang pamilya.

Wala ni magkinahanglan og makuting panukiduki, matod sa beteranong imbestigador sa iyang kaugalingon.

Dihang natumban na niya ang panit sa saging nakasiyagit og balikas ang pulis. Gihunahuna niya kon paigo pa ba ang gidala niyang sapi aron pagpalit sa inasal.

Nalamba ang pulis duol sa ‘convenient store.”

Ang iyang armas nga kalkbre .45 nga diha sulod sa iyang handbag mibuto ug naigo ang sekyu sa ‘Convenience.store.’ Ang sekyu padung na unta mouli ug nagplano nga mopalit og inasal nga manok alang sa iyang asawa nga nagsaulog sa iyang birthday karong adlawa. Kay wala man gisablay sa sekyu ang ‘sling’ sa iyang shotgun, nabuhian niya ang maong armas. Mibuto kini ug naigo ang tulo ka lalake nga nagplanong lungkabon ang kumbento sa simbahan nga atbang sa ‘convenience store.’

Sa wala pa maigo sa mga ‘pellets,’ usa sa mga lalake – ang sakristan sa simbahan – mipadayag sa iyang kabalaka nga mapalpak sila.

Ang iyang higala nga maoy nakahunahuna og lungkab mipasalig nga dili sila mapalpak. Plantsado na kuno ang iyang plano.

Ang ikatulo nga lalake nga upat na ka botelya sa beer ang nahurot, mingisi. Kon maigo tas kilat karong higayuna, bungkag ang atong ang plano.

Nangawot sa iyang ulo ang sakristan ug misaysay, “Ang balaod sa kinaiyahan o ang balaod sa sirkumstansiya nagkanayon nga dili gyud nato matagna kon unsay mahitabo sa unahan. Makahunahuna ta unsay mahitabo nato sa unahan. Makahunahuna ta unsay mahitabo nato sa unahan, apan dili ta kaseguro nga mao gyud nay mahitabo.”

Unsa nang klaseha sa balaod? Nangutana ang utok sa pagpanglungkab. Balaod nga wala mahisulat, matod sa sakristan. Ulipon ta sa balaod nga dili minugna sa mga magbabalaod.

Taymsa. Sa dili pa ta matapos, buhi diay silang PO3 Maccor, ang sekyu, ang sakristan ug ang iyang duha ka higala. Ang ilang plano lang ang nangamatay. (Katapusan)