SA niaging adlaw nagbansiwag sa mga lokal nga mga pamantalaan nga putlan ni Cebu City Mayor Tomas Osmeña sa honorarium ang mga tanod ug garbage loaders sa 80 ka mga barangay sa dakba­yan sa Sugbo.

Sa iyang memorandum nga pinitsahan niadtong Enero 24, iyang gisaysay nga ang kakulang sa pundo sa panudlanan maoy rason kon nganong iyang putlon ang maong honorarium.

Ang memo nga gipang-apod-apod sa mga barangay nagpahibawo nga kini iyang kamanduan moepek­to sugod sa Pebrero 1. Dili man tuod tanan, apan mayoriya sa barangay ang maapektohan niini ilabi na kadtong atoa sa kabukirang dapit.

Daghang mga kilay ang niisa sa maong lakang sa mayor kay lagi ang barangay mao man gyud unta ang extensiyon sa iyang buhatan aron mapalapdan ang iyang serbisyo ngadto sa katawhan.

Pero kagahapon, mora man og naliso ang baruganan sa mayor og 360 degrees.

Nakamatikod siguro sa negatibong epekto sa iyang lakang o kaha dunay nakapindot, si Osmeña da­ling miluwat og pamahayag nga nagpasabot nga ipaubos ra diay sa evaluation ang mga tanod ug garbage loader kay kasagaran niini nagbinuang sa ilang trabaho.

Apan kon atong tuki-on og maayo ang unod sa memo, layo ra sa tinuod ang iyang girason.

Ang memorandum nagkanayon, “Please be informed that effective February 1, 2017, the City Government of Cebu will no longer provide honoraria to barangay tanods and garbage loaders due to budget limitations.”

Asa man ang iyang giingon nga evaluation sa mga tanod ug garbage loaders niining maong memo?

Buot ba ipasabot nga way kalibutan si Osmeña nga ang nahisgutang allowance nalakip ug nalatid na sa budget ordinance, sigon ni konsehal Raymund Garcia kinsa andam nga mokwestiyon kaniya.