NAGTUO si Talk N’ Text KaTropa coach Nash Racela nga gipaburan sa mga referee ang San Miguel Beermen sa Game 4 sa ilang best-of-seven semi-finals series hinungdan sa ilang 86-97 nga kapildihan niadtong Martes sa gabii sa Philippine Basketball Association (PBA) Philippine Cup.

Ang kadaugan sa Beermen ma­oy nakatabla sa gikaintapang series, 2-2.

Human sa kapildihan sa Beermen sa Game 3, ang ilang mga beterano nga sila si Chris Ross ug Marcio Lassiter mitagawtaw sa mga referee nga wala mohatag og respeto sa Beermen isip two-time reigning all-Filipino champion.

Alang kang Racela, kampiyon o dili, kinahanglang wala’y paburan ang mga referee.

“They got what they want,” batbat ni Racela sa interbyu sa Spin.ph. “They’re demanding some treatment from the referees after the last game. If you heard what Ross and Lassiter said, they got it today. It’s that kind of entitlement because they are the champions.”

Sa Game 4, ang Beermen nakakuha og 24 ka freethrows gikan sa mga tawag sa referee kumpara sa 12 sa KaTropa.

Alang kang Racela, wala’y bisan unsa nga team ang hatagan og ‘espisyal nga pagtrato’ sa mga referee.

“If you want to do something, you demand the right calls from the referees. If you win by getting the right calls, if you lose by getting the right calls, then tanggapin natin, but don’t demand for some special treatment,” dugang ni Racela.

“Sa aking standard, that is wrong.”

Mihangyo si Racela sa mga re­feree nga magmakiangayon sa ilang mga tawag.

Apan alang kang Beermen coach Leo Austria, ningkayod lang og maayo ang iyang mga batos aron makalikay sa 1-3 nga biya sa series.

“I have to commend my players dahil nagkaroon sila ng sense of urgency,” asoy ni Austria. “Alam nila ang sitwasyon namin, especially Chris Ross. He was really focused.”

Nagbangis si Ross ug nagpa­katap kini’g 31 puntos aron pangulohan ang kadaugan sa Beermen sa Game 4.

Magsangka og balik ang duha ka mga kampo karong gabii alang sa Game 5 sa Araneta Coliseum.

Puntos matag usa

SMB (97) – Ross 31, Fajardo 15, Lassiter 12, Cabagnot 12, Espinas 10, Garcia 8, Santos 7, Tubid 2

TNT (86) – Fonacier 15, Castro 13, Tautuaa 12, Williams 10, Pogoy 9, Rosario 5, Ganuelas-Rosser 4, R. De Ocampo 4, Rosales 4, Carey 4, Reyes 4, Seigle 2.