DUGANG 10,000 ka mga food pack ang gikatakda nga ipadala sa Department of Social Welfare and Development (DSWD) 7 ngadto sa dakbayan sa Surigao isip hinabang sa mga residente nga apektado sa linog sa milabay nga semana.

Ang tigpamaba sa DWSD 7, Leah Quintana, nibutyag nga niadtong nakalabay nga gabii naabot na sa Surigao ang unang 12,500 ka food packs nga ilang gipadala.

Kagahapon sa alas 3:00 sa kaadlawon usab dihang nilarga ang barko nga nagdala sa 7,500 ka food packs nga gipangayo sa Caraga Region.

Matod ni Quintana nga 30,000 ka food packs ang gipangayo sa maong rehiyon diin mao usab kini ang ilang gipadala isip hinabang.

Andam hinuon ang DSWD 7 nga mopadala pa og dugang food packs pananglitan mohangyo pa ang maong rehiyon og dugang hinabang.

Ang maong food packs adunay sulod nga unom ka kilo nga bugas, upat ka lata sa sardinas, laing upat ka canned goods nga meat susama sa beef loaf ug corned beef ug unom ka sachet sa kape.

Nagkantidad ang matag food pack og P360 diin sulod kini sa tulo ka adlaw nga kunsumo sa matag tawo.

Nipasalig usab si Quintana nga aduna’y standby nga food packs sa ilang bodega diin gi-repack kini alang sa Central Visayas pananglitan og magkinahanglan.