NAPALGANG wala nay kinabuhi ang 15 anyos nga batang lalaki human kini naghikog didto sa Barangay Carmelo, Tuburan miaging Martes sa alas 4:30 sa hapon.

Ang patay lawas naila nga si Mark Anthony Bato, Grade 7 ug taga Barangay Carmelo, Tuburan.

Matod ni PO1 Alvin Canoog nga si Bato naghikog gumikan sa kahadlok nga kini makasab-an sa iyang mga ginikana tungod sa iyang perming pagka-late sa klase ug ingon may aduna kini hagbong sa iyang grado.

Usa sa gikahadlokan niini mao nga mabunalan siya sa iyang amahan.

Dugan ni Canoog nga niuli si Bato sa ilahang balay aron maniudto ug gisugo kini sa amahan nga magpakaon sa ilang binuhi sa dili pa kini mo balik sa eskwelahan.

Sa pipila ka oras ang nilabay, nakit-an ang patayng lawas nini sa payag-payag sa ilang silingan duol sa ilang balay ug nga nagbitay gamit ang usa ka pisi. Diana Grace G. Pila, USJ-R Communication Intern