TULISAN namatay samtang iyang kauban nadakpan human sa pinusilay atol sa Valentine’s Day sa Sitio Tapal, Barangay Guadalupe, dakbayan sa Carcar.
Si Loloy Esmaer, hingkod, taga San Miguel, dakbayan sa Talisay namatay pipila ka minutos human nadala sa tambalanan sa dakbayan sa Carcar tungod sa mga samad pinusilan.
Samtang nasikop sa mga tawo sa dapit ug gi-turnover ngadto sa kapulisan ang iyang silingan nga si Joe Bryan Taborada, 23, human mogawas sa iyang gitagoan.
Si Chief Insp. Jose Lidawa, hepe sa Carcar Police Station, nibutyag sa Superbalita Cebu nga nakadawat silag tawag sa telepono gikan sa Dumanjug Police Station kabahin sa duha ka tulisan nga sakay sa motorsiklo gikan nanulis sa lungsod niadtong Martes sa alas 4 sa hapon.
Nipahigayon og road block si SPO4 Jorame Tanudtanud ug mga kauban sa Barangay Guadalupe.
Ning-agi sila si Esmaer ug Taborada nga nagmotorsiklo ug dihang nakita nilang nasibo sa description, ilang gipahunong.
Apan wa mohunong ang duha mao nga nahitabo ang ginukdanay tali sa kapulisan.
Ninglahos sila si Esmaer ug Taborada sa Sitio Capilan, Barangay Poblacion 1, diin sila na-corner sa kurbadang karsada ug nangatumba.
Ningdagan ang duha sa sudlunon nga bahin sa nahisgutang Barangay diin ningsuway unta kini sa pagpang-hostage sa mga tawo sa dapit.
Gumikan niini, sila si PO1 Miguelito Abadilla ug PO1 Jessie Desales ningpaila kanila nga mga pulis ug mo-surrender.
Pero wa mopatuo sila si Esmaer ug Taborada, ningpusil sila sa mga pulis hinungdan nga napugos ang tropa sa pagbawos.
Naigo si Esmaer samtang si Taborada nidagan.
Ang mga suspek positibong giila sa biktima nga si Josuel Macarine, ahente sa usa ka kompaniya nga nakuhaan og P10,000 nga cash.
Si Taborada ningtago, apan paglabay sa pipila ka oras nasikop dihang nigawas nga wa na mag-jacket.
Narekuber sa kapulisan ang motorsiklo nga gigamit sa mga suspek ug mga importanting butang, mga gamit sa mga biktima.
Si Sr. Insp. Gilfred Baroman, hepe sa Dumanjug Police Station nga nahinabi sa Superbalita Cebu, nibutyag nga mga alas 12 sa samang adlaw nanawag nila ang Alcantara police station kabahin sa duha ka tulisan nga nanulis og collector sa lending sa Barangay Palanas, Alcantara.
Nipahigayon og road block ang Dumanjug Police apan nakauna na sa pag-agi sila si Esmaer ug Taborada ug nakasulod na sa lungsud sa Dumanjog.
Pagka-alas 2 sa hapon sa samang adlaw nakadawat silag report nga si Macarine gitulis sa duha ka mga tawo nga nagsakay sa motorsiklo.
Ang description sa duha sibo sa mga tulisan nga nanulis sa Alcantara hinungdan nga nangayo silag abag sa kapulisan sa dakbayan sa Carcar.
Matod pa ni Baroman nga si Macarini mitubag sa sugo sa lawas niadtong higayuna hinungdan nga mihunong.
Nisunod ang mga suspek ug nideklarar og tulis.