USA ka madre gikan sa Surigao del Sur nangangkon nga siya giayo ni anhing Archbishop Teofilo Camomot.

Si Mother Rebecca Hawak, superior sa Poor Clare Monastery sa Cantilan, Surigao del Sur, gikatahong nag-antos sa tumor sa iyang tuo nga mata dihang niduaw siya sa lubnganan ni Camomot sa Daughters of St. Therese (DST) Mother House sa Barangay Valladolid, Carcar City.

Si Hawak naalim sa iyang sakit human siya mohigda sa katre sa namatay nga arsobispo sulod sa museum likod sa iyang lubnganan, matod ni Reverend Mother Maria Louella Grace Buscato, superior sa DST Mother House.

Ang pagkaalim ni Hawak nahitabo pipila ka mga semana sa di pa ang ika 103 nga adlaw nga natawhan ni Camomot sa Marso 3.

Si Fr. Mhar Vincent Balili, vice postulator sa cause for beatification ni Camomot, niingon nga ang pagkaalim ni Hawak magdasig sa mga tawo sa pagpangayo og giya sa arsobispo.

Matod ni Buscato sa Sun.Star Cebu nga sila si Hawak ug ang iyang mga kauban nga madre nianhi sa Sugbo sayo ning buwana aron pagduaw sa lubong ni Camomot.

Gusto ni Hawak nga mobisita sa lubnganan sa namatay nga obispo aron maalim ang iyang tumor nga nakaingon sa paghubag sa iyang tuo nga mata ug nilagom.

Matod ni Buscato nga ang tumor nakaapekto sa panan-aw ni Hawak.

Samtang nagsusi sa mga butang ni Camomot, si Hawak gikataho nga nihigda sa daan nga katre ni Camomot ug nag-ampo alang alang sa pag-alim kaniya.

Paglabay sa pipila ka minutos, nakugang si Hawak kay mabuka na ang iyang duha ka mga mata.

Nakabantay usab ang iyang kauban nga mga madre nga nihanap ang lagom sa tuong mata ni Hawak.

Sila si Hawak ug iyang kauban nga mga madre nga gisanapan sa tumang kalipay daling nangadto kang Buscato aron sugilan sa hitabo.

Sa interview ni Buscato kang Hawak, kini nitug-an nga tulo ka mga doktor ningbalibad sa pag-opera kaniya, kay nahadlok nga mabuta na hinuon siya.

Si Balili, sa lahi nga interbyu, niingon nga siya nagplano na susihon ang sakit ni Hawak aron pagdeterminar kon ang milagro nga iyang nasinati kwalipikado ba sa beatification ni Camomot.

Usa sa mga rekisito sa pagkasantos naglakip sa lima ka tuig nga paghuwat aron pagdeterminar kon ang pagkaalim sa usa ka tawo pinaagi sa pag-ampo, maisip bang milagro.

Apan matod ni Balili nga naa ra sa mga opisyal sa simbahan sa Rome ang pagdeterminar sa milagro ni Hawak kon tinud-anay ba.

Ang Archdiocese of Cebu nangandam sa tanang mga dokumento ug mga testimoniya alang sa paghikay sa beatification ni Camomot. (Sun.Star Cebu)