UNSA kaha ang tumong ug tinguha sa armadong grupo sa Communist Party of the Philippines (CPP) nga mao ang New People's Army (NPA) nga hangtud karon dili man gihapon sila mosanong sa padagan ni President Rody Duterte taliwala sa kahigayonan nga gihatag sa kagamhanan sa Pilipinas nga ikahinabi sila aron makad-abot ang gidamgong kalinaw sa nasud.
Dili nato makwestyon ang ilang tinguha nga makabaton og patas nga gobyerno ang katawhan.
Usa ka makiadmanong tawo sa Pilipinas ang akong nahinabi ang nagsulti nga dili gayud magkasinabot ang tanang gobyerno sa Pilipinas bisan kinsa ang lider niini tungod kay tinguha sa CPP-NPA-NDF nga sila ang mohari sa Pilipinas.
Nakaabot og 50 anyos ang pakigbisog sa armadong grupo tungod kay consistent ang mga lider niini diha sa ilang sistema nga kon maipit sa giyera, motawag gilayon og ceasefire ug mopakita gilayon og interes nga sabutan na lamang ang pagbaton sa kahusay ug kaangayan.
Apan paagi lamang kini aron makatigum na usab og kusog, ug maka-recuit sa dugang miyembro ubos sa mga pasalig nga kon malumpag na ang kasamtangang gobyerno, sila na ang mohari.
Sagad sa mga nadani niini mao kadtong nakabaton og inhustisya labina gayud ang inhustisya sa tiyan ug nawad-an na sa paglaum nga makapanimuyo sila desente ug kaharuhay.
Alang kanako kon masabtan lamang nila ang tinguha sa atong pangulo, mabatnan nato ang tinguhang kaharuhay bisan og dili kita mogamit og armas.
Ang giduso nga sistemang federal sa atong pangulo mao ang paagi nga makabaton kita og kahamugaway ug hustisya nga atong gipangayo.
Ang nakadaot man god kay dili motugot kining uban nga mag-federal kita kay tingali og mo-asenso na ang atong kinabuhi ug wala na unyay motuo sa ilang organisasyon (kung unsay organisasyon nga imong nahuna-hunaan mao na kana).
Wala kitay kaaway nga mga foreign invaders, busa hangyo nato sa gobyerno nga tinud-on na lang ang pagsumpo sa insureksiyon sa nasud kay mao kini ang nakapugong sa atong pag-asenso.
Balikan nato ang paningkamot ni Mao sa China ug ang USSR nga nabungkag tungod kay dili kini ang paagi aron moasenso ang nasud.
Kining mga nahisgutang nasud nakabakod ug karon usa na sila sa gamhanang mga nasud kalibutan.
Walay mo-asenso sa komunismo ilabina kon dili kini madawat sa katawhan mao nga ang nasud Cuba hangtud karon kuba lamang gihapon.