DIGOS CITY -- Giorganisa sa mayor sa dakbayan ang gitawag og Drug Victim of Digos (DVD) tumong nga matabangan sila sa lokal nga kagamhanan.

Mismong si Mayor Joseph Peñas ang nangulo sa pag-organisa sa DVD aron mahatagan sila og ayudang panginabuhian.

Matag barangay gimugna ang DVD ug pinakaunang na-organisa ang DVD Barangay Tiguman Chapter diin mihimo og piliay alang sa mga opisyales nga mamuno niini.

Si Peñas nga nangulo sa City Anti-Drug Abuse Council (Cadac) mao sab ang nipahural sa mga bag-ong napiling opisyal sa DVD.

Gipailawom sab sa drug abuse orientation ang mga sakop sa DVD aron masegurong likayan na gyud nila ang druga.

Sumala sa mayor nga dako og ikatabang ang DVD sa kampanya sa nasyonal ug lokal nga gobyerno sanglit motabang sila pagpaniid sa ilang palibot.

Giawhag sab ang mga sakop sa DVD nga ipaabot dayon sa mayor ning dakbayan kon mamatikdan nga adunay mga tawong nagpayuhot og druga sa ilang lugar aron hinanaling masikop sa mga sakop sa Philippine Drug Enforcement Agency.

Milagda sab og commitment paper ang mga sakop sa DVD aron hingpit nilang mapakaylap ang temang "Likayi ang Droga kung kinabuhi imong gihigugma" ngadto sa ilang matag barangay.

Sumala ni Peñas nga adunay ayudang panginabuhian ang mga sakop sa DVD aron di na sila mosulod sa ilegal nga binuhatan aron mabuhi. (Orlando B. Dinoy)